نئی دہلی
راؤز ایونیو عدالت نے ہفتہ کے روز نیٹ-یو جی پرچہ لیک معاملے میں ملزمہ منیشا سنجے حوالدار کی سی بی آئی حراست میں مزید توسیع کر دی۔ عدالت نے ایک اور ملزمہ منیشا منڈھارے کو سی بی آئی کی 14 روزہ حراست مکمل ہونے کے بعد عدالتی تحویل میں بھیج دیا۔خصوصی جج (سی بی آئی) اجے گپتا نے منیشا سنجے حوالدار کی سی بی آئی تحویل پیر تک بڑھانے کا حکم دیا۔
عدالت نے منیشا منڈھارے کو دو جوڑی چشمے اپنے ساتھ رکھنے کی بھی اجازت دی۔سی بی آئی نے منیشا سنجے حوالدار کو نیٹ-یو جی پرچہ لیک کیس کی تحقیقات کے سلسلے میں چھ روزہ حراست مکمل ہونے کے بعد عدالت میں پیش کیا۔ انہیں مہاراشٹر کے پونے سے گرفتار کیا گیا تھا۔ وہ فزکس کی ماہر اور مترجم کے طور پر کام کرتی رہی ہیں۔سی بی آئی کی جانب سے سینئر پبلک پراسیکیوٹر وی کے پاٹھک عدالت میں پیش ہوئے۔
دیگر ملزمان اور طلبہ سے آمنے سامنے تفتیش ضروری: سی بی آئی
مزید حراست کی درخواست کرتے ہوئے سی بی آئی نے کہا کہ منیشا کو دیگر ملزمان کے ساتھ آمنے سامنے بٹھا کر پوچھ گچھ کرنا ضروری ہے۔ اس کے علاوہ انہیں بعض طلبہ کے ساتھ بھی روبرو کرایا جانا ہے تاکہ تحقیقات کو آگے بڑھایا جا سکے۔سی بی آئی کا الزام ہے کہ منیشا نے دیگر ملزمان کے ساتھ سازش کرتے ہوئے امتحانی پرچہ اپنے پاس غیر قانونی طور پر محفوظ رکھا اور رقم کے عوض اسے تقسیم کیا۔
این ٹی اے کی فزکس مترجم تھیں
سی بی آئی نے 25 مئی کو ریمانڈ کی درخواست دیتے ہوئے عدالت کو بتایا تھا کہ منیشا سنجے حوالدار کو نیشنل ٹیسٹنگ ایجنسی (این ٹی اے) نے فزکس مترجم کے طور پر نامزد کیا تھا۔تحقیقی ایجنسی کے مطابق انہوں نے دیگر ملزمان کے ساتھ مل کر نیٹ-یو جی کا سوالیہ پرچہ غیر قانونی طور پر اپنے پاس رکھا اور مالی فائدے کے لیے دوسروں تک پہنچایا۔ ایجنسی کا کہنا ہے کہ سازش میں شامل دیگر افراد کی شناخت اور پورے نیٹ ورک کا پتہ لگانے کے لیے مزید تفتیش ضروری ہے۔
وکیل نے پولیس حراست کی مخالفت کی
منیشا کی جانب سے وکیل اکھیلیش ریکسوال نے مزید ریمانڈ کی مخالفت کرتے ہوئے کہا کہ ان کی موکلہ کو 22 مئی کو گرفتار کیا گیا تھا اور انہوں نے تحقیقات میں مکمل تعاون کیا ہے۔انہوں نے عدالت سے کہا کہ پولیس حراست دینے کی کوئی معقول وجہ موجود نہیں، لہٰذا انہیں عدالتی تحویل میں بھیجا جانا چاہیے۔
