نئی دہلی
نیشنل ٹیسٹنگ ایجنسی (این ٹی اے) نے تین مئی کو منعقد ہونے والے میڈیکل داخلہ امتحان “نیٹ-یو جی 2026” کو پرچہ لیک ہونے کے الزامات کے پیشِ نظر منگل کو منسوخ کرنے کا اعلان کر دیا، جبکہ حکومت نے ان “بے ضابطگیوں” کی تفصیلی جانچ کے لیے معاملہ سی بی آئی کے حوالے کرنے کا حکم دیا ہے۔
میڈیکل کالجوں میں انڈر گریجویٹ کورسز میں داخلہ لینے کے خواہش مند طلبہ کے لیے یہ امتحان اب دوبارہ منعقد کیا جائے گا، جس کی تاریخوں کا اعلان الگ سے کیا جائے گا۔نیشنل ٹیسٹنگ ایجنسی نے سوشل میڈیا پلیٹ فارم “ایکس” پر جاری بیان میں کہا کہ یہ فیصلہ شفافیت برقرار رکھنے اور قومی امتحانی نظام پر اعتماد قائم رکھنے کے لیے لیا گیا ہے۔
بیان میں کہا گیا کہ مرکزی ایجنسیوں کے ساتھ این ٹی اے کی جانب سے حقائق کی جانچ اور قانون نافذ کرنے والی ایجنسیوں کی فراہم کردہ معلومات کی بنیاد پر، حکومتِ ہند کی منظوری سے تین مئی 2026 کو منعقد نیٹ (یو جی) 2026 امتحان کو منسوخ کرنے اور نئی تاریخوں پر دوبارہ امتحان لینے کا فیصلہ کیا گیا ہے۔
نیٹ یو جی 2026 امتحان تین مئی کو ہندوستان کے 551 شہروں اور دیگر ممالک کے 14 شہروں میں منعقد کیا گیا تھا۔ یہ امتحان تقریباً 23 لاکھ رجسٹرڈ امیدواروں کے لیے لیا گیا تھا۔
ایجنسی نے کہا کہ موصولہ اطلاعات اور قانون نافذ کرنے والی ایجنسیوں کی تحقیقات سے یہ واضح ہو گیا ہے کہ “موجودہ امتحانی عمل کو جاری رکھنا مناسب نہیں ہے۔
این ٹی اے نے مزید کہا کہ دوبارہ ہونے والے امتحان کی تاریخیں اور ایڈمٹ کارڈ جاری کرنے کا شیڈول آئندہ چند دنوں میں ایجنسی کے سرکاری ذرائع کے ذریعے جاری کیا جائے گا۔ایجنسی نے بتایا کہ حکومت نے امتحان سے متعلق الزامات کی جامع جانچ کے لیے معاملہ مرکزی تفتیشی بیورو (سی بی آئی) کے سپرد کرنے کا فیصلہ کیا ہے۔
دریں اثنا، گزشتہ ہفتے سماعت شروع ہونے پر گیانا کے وزیرِ خارجہ ہیوگ ہلٹن ٹوڈ نے ججوں سے کہا تھا کہ یہ تنازع “ایک خودمختار ملک کے طور پر ہمارے وجود پر ابتدا ہی سے ایک داغ رہا ہے۔” انہوں نے کہا کہ گیانا کے 70 فیصد علاقے کا مستقبل اس معاملے سے جڑا ہوا ہے۔
