پٹنہ/ آواز دی وائس 

ہندوستان کے مرکزی وزیر زراعت شیوراج سنگھ چوہان ہفتہ کو بہار پہنچے جہاں انہوں نے مکھانہ فیسٹیول میں شرکت کی اور اس بات پر زور دیا کہ مکھانہ کی پیداوار میں اضافہ کیا جائے اور ساتھ ہی اس کی پیداواری لاگت میں کمی لائی جائے۔  چوہان نے پُر اعتماد انداز میں کہا کہ نیشنل ڈیموکریٹک الائنس (این ڈی اے) ایک بار پھر بہار میں حکومت بنائے گا۔

انہوں نے کہا کہ وزیر اعظم نریندر مودی کی قیادت میں مرکزی حکومت اور وزیر اعلیٰ نتیش کمار کی قیادت میں ریاستی حکومت نے ترقی کی ایسی گنگا بہائی ہے جو پوری دنیا کے لیے مثال ہے… ہمیں مکھانہ  کی پیداوار میں اضافہ کرنا ہوگا اور اس کی پیداواری لاگت کم کرنی ہوگی… میں پورے اعتماد کے ساتھ کہتا ہوں کہ اس بار این ڈی اے حکومت بہار میں ریکارڈ توڑ اکثریت کے ساتھ پھر سے بنے گی… اس سے پہلے مرکزی وزیر نے ایکس (سابقہ ٹوئٹر) پر ٹویٹ کیا کہ بہار کے پیارے بھائیو اور بہنوں، بھانجوں اور بھانجیوں۔ آج میں پٹنہ میں مکھانہ  فیسٹیول میں آ رہا ہوں۔ مکھانہ بہار کا فخر ہے۔

حال ہی میں، 15 ستمبر کو، وزیر اعظم نریندر مودی نے بہار میں نیشنل مکھانا بورڈ کا آغاز کیا۔ یہ بورڈ پیداوار اور نئی ٹیکنالوجی کی ترقی کو فروغ دے گا، کٹائی کے بعد کے انتظامات کو مضبوط کرے گا، ویلیو ایڈیشن اور پروسیسنگ کو فروغ دے گا اور مکھانہ کے لیے مارکیٹ، برآمدات اور برانڈ ڈیولپمنٹ کو آسان بنائے گا، جس سے بہار اور ملک کے مکھانہ کسانوں کو فائدہ ہوگا۔

بہار ملک کی کل مکھانہ  پیداوار کا تقریباً 90 فیصد فراہم کرتا ہے۔ مدھوبنی، دربھنگہ، سیتامڑھی، سہارسا، کٹیہار، پورنیہ، سپول، کشن گنج اور ارریہ جیسے اہم اضلاع بنیادی مراکز ہیں کیونکہ یہاں کا موافق موسم اور زرخیز مٹی مکھانا کی اعلیٰ معیار کی پیداوار میں معاون ہے۔ بہار میں مکھانا بورڈ کا قیام ریاست اور ملک میں مکھانا کی پیداوار کو زبردست تقویت دے گا اور اس شعبے میں بہار کی موجودگی کو عالمی نقشے پر مزید مضبوط کرے گا۔