گوہاٹی

 مرکزی وزیرِ داخلہ امت شاہ نے ہفتہ کے روز کہا کہ حکومت کی طرف سے مقرر کی گئی 31 مارچ کی آخری تاریخ تک ملک سے نکسلواد کا مکمل خاتمہ کر دیا جائے گا۔ یہاں سینٹرل ریزرو پولیس فورس کے 87ویں یومِ تاسیس کی پریڈ سے خطاب کرتے ہوئے، جو شمال مشرق میں پہلی بار منعقد ہوئی، امت شاہ نے کہا کہ سی آر پی ایف نے جموں و کشمیر میں اہم کردار ادا کیا ہے، جہاں پتھراؤ کے واقعات صفر پر آ گئے ہیں۔ اس کے علاوہ فورس منی پور میں نسلی تشدد سے نمٹنے اور صرف تین برسوں میں ماؤ وادیوں کی کمر توڑنے میں بھی کامیاب رہی ہے۔

انہوں نے کہا كہ مجھے سی آر پی ایف پر پورا بھروسا ہے اور میں پورے اعتماد کے ساتھ کہہ سکتا ہوں کہ 31 مارچ 2026 تک ہم ملک سے نکسلی مسئلے کا خاتمہ کر دیں گے۔ وزیرِ داخلہ نے چھتیس گڑھ–تلنگانہ سرحد پر کاریگوٹا پہاڑیوں میں اپریل–مئی 2025 کے دوران چلائے گئے 21 روزہ آپریشن “بلیک فاریسٹ” کی ستائش کی، جس میں 31 نکسلی مارے گئے۔

انہوں نے بتایا کہ 46 ڈگری سیلسیس کی شدید گرمی میں، جہاں روزانہ پسینے کے ذریعے 15 لیٹر پانی جسم سے خارج ہو رہا تھا، سی آر پی ایف کے جوانوں نے تپتے پتھروں کا مقابلہ کرتے ہوئے پہاڑ کو نکسلیوں کے قبضے سے آزاد کرایا اور ان کے مضبوط ٹھکانوں کو تباہ کیا۔ امت شاہ نے کہا کہ 10–11 برس پہلے ملک میں تین بڑے ہاٹ اسپاٹس تھے—جموں و کشمیر میں دہشت گردی، نکسلواد اور شمال مشرق میں شورش—جو ناسور بن چکے تھے، لیکن آج وہ امن اور ترقی کے مراکز بن چکے ہیں۔

انہوں نے کہا كہ یہ تینوں علاقے، جو کبھی بم دھماکوں، گولیوں، ناکہ بندیوں اور تباہی کے مناظر کے لیے جانے جاتے تھے، آج ملک کی ترقی کا حصہ ہیں۔ ترقی کے انجن بن کر یہ پورے ملک کی ترقی کو آگے بڑھا رہے ہیں۔ وزیرِ داخلہ نے کہا کہ سی آر پی ایف کی قربانیوں کے بغیر یہ امن ممکن نہیں تھا۔ انہوں نے بتایا کہ شمال مشرق میں 700، نکسلی علاقوں میں 780 اور جموں و کشمیر میں 540 سی آر پی ایف اہلکار شہید ہوئے۔

انہوں نے کہا كہ ان قربانیوں کے بغیر آج ان تینوں ہاٹ اسپاٹس کو ترقی کی راہ پر لانا ناممکن تھا۔ اگر آسام کی بات کروں تو یہاں 79 جوانوں نے امن قائم کرنے کے لیے اپنی جانیں قربان کیں۔ امت شاہ نے نشاندہی کی کہ سی آر پی ایف کی 86 سالہ تاریخ میں پہلی بار اس کا یومِ تاسیس شمال مشرق میں، “ہمارے آسام” میں منایا جا رہا ہے، جو پورے خطے کے لیے فخر کی بات ہے۔

انہوں نے کہا كہ 86 برسوں میں سی آر پی ایف نے نہ صرف شاندار کارکردگی دکھائی بلکہ ملک کی سلامتی کا مضبوط ستون بن کر ٹھوس نتائج بھی دیے۔ اس دوران 2,270 جوانوں نے اعلیٰ ترین قربانی دی۔ میں ان سب کو سلام پیش کرتا ہوں اور انہیں خراجِ عقیدت پیش کرتا ہوں۔ انہوں نے مزید کہا کہ آئین کے آرٹیکل 370 کی دفعات کے خاتمے کے بعد جموں و کشمیر میں ایک بھی گولی چلانے کی ضرورت نہیں پڑی، جس میں سی آر پی ایف کا اہم کردار رہا۔

اس موقع پر وزیرِ داخلہ نے 15 سی آر پی ایف اہلکاروں کو بہادری کے تمغے عطا کیے، چھ اہلکاروں کو صدر کا پولیس تمغہ برائے امتیازی خدمات دیا گیا اور بہترین کارکردگی دکھانے والی بٹالینز کو ٹرافیاں پیش کی گئیں۔ اس سے قبل سی آر پی ایف کے ڈائریکٹر جنرل جی پی سنگھ نے کہا کہ آپریشن بلیک فاریسٹ نے نکسلیوں کی کمر توڑ دی ہے اور حکومت کی مقررہ مدت تک نکسلواد کا خاتمہ یقینی بنایا جائے گا۔

ہفتہ کے روز سرسجائی اسٹیڈیم میں ملک بھر سے آنے والے آٹھ سی آر پی ایف دستوں نے شاندار پریڈ پیش کی، جو 3.25 لاکھ اہلکاروں پر مشتمل فورس کی 86 سالہ تاریخ میں شمال مشرق میں پہلی بار منعقد ہوئی۔ رنگ برنگے ہیڈ گیئر میں ملبوس جوانوں کی قدم تال اور گونجتے ڈھولوں کی تھاپ پر ہونے والی مارچ پاسٹ نے حاضرین سے خوب داد وصول کی۔ پریڈ کی قیادت 225ویں بٹالین کے کمانڈنٹ دیپک دھوندیال نے کی۔

مارچ کرنے والے دستوں میں نادرن سیکٹر (خواتین اہلکاروں سمیت)، نارتھ ویسٹرن سیکٹر، جھارکھنڈ، اوڈیشہ، ریپڈ ایکشن فورس ، کوبرا یونٹ اور ویسٹرن و نارتھ ایسٹرن سیکٹرز شامل تھے۔

تقریب کے اختتام پر مہارت کے مظاہرے اور تیکنیکی ڈیمونسٹریشنز پیش کی گئیں۔ خواتین اہلکاروں نے پیچیدہ رائفل ڈرل دکھائی، کمانڈوز نے یرغمالیوں کی بازیابی کی فرضی کارروائی پیش کی اور کوبرا کمانڈوز نے جنگلاتی لڑائی کی مشق کے ذریعے نکسلواد مخالف آپریشن کی منظرکشی کی۔

سی آر پی ایف کی پہلی بٹالین 1939 میں برطانوی دورِ حکومت میں “کراؤن ریپریزنٹیٹو پولیس” کے نام سے قائم کی گئی تھی۔ آزادی کے بعد 1949 میں، ملک کے پہلے وزیرِ داخلہ سردار ولبھ بھائی پٹیل نے اسے سینٹرل ریزرو پولیس فورس کا نام دیا۔