نئی دہلی

مرکزی وزیرِ محنت و روزگار منسکھ مانڈویہ نے جمعرات کو 40 سال اور اس سے زیادہ عمر کے مزدوروں کے لیے ملک گیر مفت سالانہ صحت جانچ پروگرام کا آغاز کیا۔دہلی میں واقع ای ایس آئی سی میڈیکل کالج اور اسپتال میں منعقدہ پروگرام سے خطاب کرتے ہوئے مانڈویہ نے کہا کہ چار لیبر کوڈز کا نفاذ ملک بھر کے مزدوروں کے لیے عزت، فلاح و بہبود اور سماجی تحفظ کو یقینی بنانے کے وزیر اعظم نریندر مودی کے عزم کی عکاسی کرتا ہے۔

وزیرِ محنت و روزگار نے اس موقع کو ’’شکتی‘‘ کے احترام کا دن قرار دیتے ہوئے کہا کہ حکومت تمام مزدوروں کے لیے سماجی تحفظ کے دائرے کو مضبوط بنانے کے لیے پُرعزم ہے

انہوں نے کہا کہ وزیر اعظم مودی کی قیادت میں گزشتہ 12 برسوں کے دوران حکومت نے روزگار کے مواقع پیدا کرنے اور فلاحی اقدامات کے ذریعے ’’شکتی‘‘ اور ’’یوا شکتی‘‘ کو بااختیار بنانے کا کام کیا ہے۔ ملک میں سماجی تحفظ کا دائرہ گزشتہ ایک دہائی میں تقریباً 30 کروڑ افراد سے بڑھ کر آج قریب 94 کروڑ مستفیدین تک پہنچ گیا ہے۔ یہ شرح 19 فیصد سے بڑھ کر 64 فیصد ہو گئی ہے۔

وزیر نے کہا کہ ای ایس آئی سی کا دائرہ بھی ایک دہائی پہلے تقریباً سات کروڑ مستفیدین سے بڑھ کر اب قریب 15 کروڑ مستفیدین تک پہنچ چکا ہے۔مانڈویہ نے پروگرام کا آغاز کرتے ہوئے اعلان کیا کہ اب 40 سال سے زائد عمر کے تمام مزدوروں کے لیے پورے ہندوستان میں ہر سال مفت صحت جانچ کی جائے گی۔

انہوں نے کہا کہ صحت جانچ کے ذریعے بیماریوں کا ابتدائی مرحلے میں پتہ لگایا جا سکے گا اور سامنے آنے والی بیماریوں کے علاج اور دوائیں ای ایس آئی سی سہولیات کے ذریعے فراہم کی جائیں گی۔چاروں لیبر کوڈز کے تحت اہم اصلاحات کا ذکر کرتے ہوئے وزیر نے کہا کہ مرد اور خواتین مزدوروں کے لیے مساوی تنخواہ کی فراہمی کو یقینی بنایا گیا ہے اور زچگی کی چھٹی کو 12 ہفتوں سے بڑھا کر 26 ہفتے کر دیا گیا ہے۔ خواتین کے لیے گھر سے کام کرنے (ورک فرام ہوم) کی سہولت بھی شامل کی گئی ہے۔