نئی دہلی

 آئی ٹی وزیر اشونی ویشنو نے ہفتہ کے روز کہا کہ 86 ممالک اور دو بین الاقوامی تنظیموں نے اے آئی امپیکٹ سمٹ کے اعلامیے پر دستخط کیے ہیں۔ انہوں نے بتایا کہ امریکہ، برطانیہ، کینیڈا، چین، ڈنمارک اور جرمنی بھی دستخط کنندگان میں شامل ہیں۔اعلامیے کو عالمی سطح پر مضبوط حمایت نئی دہلی میں منعقدہ ہندوستان اے آئی امپیکٹ سمٹ کے اختتام پر سامنے آئی ہے۔

ویشنو نے صحافیوں کو بتایا کہ دنیا بھر کے ممالک نے “سب کی فلاح اور سب کی خوشی” کے اصولوں کو باضابطہ طور پر تسلیم کیا ہے۔

انہوں نے کہا كہ وزیراعظم نریندر مودی کے انسان مرکز اے آئی وژن کو پوری دنیا نے قبول کر لیا ہے۔ مصنوعی ذہانت کے وسائل کو جمہوری بنانا تاکہ اے آئی کی سہولیات، خدمات اور ٹیکنالوجی معاشرے کے ہر فرد تک پہنچ سکیں، سب نے اسے تسلیم کیا ہے۔انہوں نے مزید کہا کہ اقتصادی ترقی کے ساتھ سماجی بھلائی کے توازن کو ترجیح دی گئی ہے۔

ویشنو نے کہا كہ صرف اقتصادی ترقی ہی نہیں، سماجی ہم آہنگی کو بھی مدنظر رکھنا ضروری ہے۔ تحفظ اور اعتماد کو مرکز میں رکھا گیا ہے اور انہیں اہم نکات میں شامل کیا گیا ہے،”

اور بتایا کہ ایک محفوظ، قابلِ اعتماد اور مضبوط اے آئی فریم ورک پر توجہ دی گئی ہے۔

انہوں نے کہا کہ جدت طرازی اور انسانی وسائل کی ترقی بھی اہم ترجیحی شعبوں میں شامل ہیں۔ان تمام شعبوں میں تمام ممالک نے مل کر کام کرنے پر اتفاق کیا ہے۔ تقریباً تمام شریک ممالک، جن میں امریکہ، برطانیہ، کینیڈا، چین، ڈنمارک، مصر، انڈونیشیا اور جرمنی شامل ہیں، سب نے شرکت کی۔ یہ عظیم الشان اے آئی امپیکٹ سمٹ صرف انفراسٹرکچر میں ہی 250 ارب امریکی ڈالر سے زائد کی سرمایہ کاری کے وعدے حاصل کرنے میں کامیاب رہی، جسے ویشنو نے جمعہ کے روز “بڑی کامیابی” قرار دیا تھا۔

انہوں نے بتایا کہ سمٹ میں شرکت کرنے والوں کی تعداد پانچ لاکھ سے تجاوز کر گئی، جو اے آئی کے شعبے میں ہندوستان کی کوششوں کے حوالے سے مضبوط ملکی اور عالمی دلچسپی کو ظاہر کرتی ہے۔ہندوستان اے آئی امپیکٹ سمٹ نے عالمی پالیسی سازوں، صنعت کے رہنماؤں اور ٹیکنالوجی ماہرین کو یکجا کیا، جس سے بین الاقوامی اے آئی گورننس اور انفراسٹرکچر کی تشکیل میں ہندوستان ایک اہم کھلاڑی کے طور پر ابھرا۔

ویشنو نے کہا كہ پانچ لاکھ سے زیادہ زائرین نے نمائش میں شرکت کی، بہت کچھ سیکھا اور دنیا بھر کے ماہرین سے بات چیت کی۔ دنیا کے تقریباً تمام بڑے اے آئی پلیئرز بڑی تعداد میں شریک ہوئے۔ کئی اسٹارٹ اپس کو اپنے کام کی نمائش کا موقع ملا۔ مجموعی طور پر مباحثوں کا معیار غیر معمولی تھا۔ انہوں نے مزید کہا کہ چاہے وزارتی مذاکرات ہوں، قائدین کا اجلاس، افتتاحی تقریب یا پوری سمٹ، ہر سطح پر شرکت اور مکالمے کا معیار شاندار رہا۔

انفراسٹرکچر سے متعلق سرمایہ کاری کے وعدے 250 ارب امریکی ڈالر سے تجاوز کر چکے ہیں، جبکہ وینچر کیپیٹل اور ڈیپ ٹیک سرمایہ کاری میں تقریباً 20 ارب امریکی ڈالر کے وعدے کیے گئے ہیں۔ ویشنو کے مطابق، یہ سمٹ نئے اے آئی دور میں ہندوستان کے کردار پر دنیا کے اعتماد کی عکاسی کرتی ہے۔

اس ہفتے دہلی میں عالمی ٹیکنالوجی کے بڑے ناموں کی موجودگی رہی، جن میں گوگل کے سندر پچائی، اوپن اے آئی کے سیم آلٹمین، مائیکروسافٹ کے بریڈ اسمتھ اور اینتھروپک کے ڈاریو امودی شامل تھے۔ مباحثوں میں ٹیکنالوجی کی دنیا کے اہم ترین عالمی موضوعات زیرِ بحث آئے، جن میں اے آئی کے مواقع اور خطرات، اے جی آئی، گورننس اور روزگار کا مستقبل شامل تھا۔