کولکتہ/ آواز دی وائس

ہندوستانی جنتا پارٹی (بی جے پی) کے قومی صدر جے پی نڈا جمعرات کو دو روزہ دورے پر مغربی بنگال پہنچے، جہاں وہ متعدد میٹنگز میں شرکت کریں گے اور ترنمول کانگریس کے زیرِ اقتدار ریاست میں آئندہ اسمبلی انتخابات کے پیش نظر پارٹی کی تیاریوں کو تیز کریں گے۔ بی جے پی کی مغربی بنگال یونٹ کے صدر سامک بھٹاچاریہ، مرکزی وزیر سوکانت مجمدار اور پارٹی کی ریاستی اکائی کے دیگر رہنماؤں نے کولکتہ ہوائی اڈے پر جے پی نڈا کا استقبال کیا۔

اپنے دورے کے دوران نڈا بی جے پی کے ضلعی یونٹ کے صدور، پارٹی کے مختلف شعبہ جات کے کنوینرز اور ’’پراواسی کارکنان‘‘ سے خطاب کریں گے۔ پارٹی کے مطابق، نڈا مغربی بنگال بی جے پی کی کور ٹیم کے ساتھ بھی ایک اہم میٹنگ کریں گے۔

بی جے پی نے بتایا کہ پارٹی صدر جمعرات کی شام کولکتہ کے تانگرا علاقے میں پارٹی کی جانب سے منعقد کی جانے والی ’ڈاکٹرز میٹ‘ میں بھی شرکت کریں گے۔ جے پی نڈا مرکزی وزیر صحت بھی ہیں۔

جمعہ کو نڈا کولکتہ کے چترنجن نیشنل کینسر انسٹی ٹیوٹ (سی این سی آئی) کا دورہ کریں گے۔ اس کے علاوہ وہ نادیہ ضلع میں واقع آل انڈیا انسٹی ٹیوٹ آف میڈیکل سائنسز (ایمس) کلیانی میں ریڈی ایشن آنکولوجی، ٹراما اور ایمرجنسی میڈیسن ڈیپارٹمنٹ اور نیومیٹک ٹیوب سسٹم کا افتتاح بھی کریں گے۔ آئندہ اسمبلی انتخابات کے پیش نظر بی جے پی کی تیاریاں پوری شدت کے ساتھ جاری ہیں، جہاں پارٹی کے اہم حکمتِ عملی ساز اور مرکزی وزیر داخلہ امت شاہ ریاست میں ممتا بنرجی حکومت کو اقتدار سے بے دخل کرنے کے لیے پارٹی کی انتخابی مہم کی قیادت کر رہے ہیں۔

مغربی بنگال کے اپنے حالیہ دورے کے دوران امت شاہ نے ترنمول کانگریس حکومت کے تحت ’’بدعنوانی، بدانتظامی اور دراندازی‘‘ کے مسائل کو اجاگر کرتے ہوئے اسمبلی انتخابات کا ماحول تیار کیا تھا۔

انہوں نے یہ دعویٰ بھی کیا تھا کہ بی جے پی دو تہائی اکثریت کے ساتھ کامیابی حاصل کرے گی۔