.webp "مسلمان نہ خوف زدہ ہیں نہ مرعوب۔ ہم اللہ پر بھروسہ رکھتے ہیں۔ مولانا خالد رشید فرنگی محلی")
اے این آئی سے گفتگو کرتے ہوئے مولانا خالد رشید فرنگی محلی نے کہا کہ اگر ہر شخص اپنے مذہب پر عمل کرے۔ دوسروں کے عقائد کا احترام کرے اور ایسے بیانات سے گریز کرے جن سے کسی بھی برادری کے جذبات مجروح ہوں تو ملک کے حالات میں نمایاں بہتری آ سکتی ہے۔
انہوں نے کہا کہ مسلمان کسی خوف کا شکار نہیں کیونکہ وہ اللہ کی بندگی کرتے ہیں۔ حقیقت یہ ہے کہ تمام انسانوں کے آباؤ اجداد مشترک ہیں۔ ہم ہمیشہ مذہب کی بنیاد پر تفریق کی مخالفت کرتے آئے ہیں۔ اگر ملک میں بہتر ماحول قائم کرنا ہے تو ہر شخص اپنے مذہب پر عمل کرے۔ دوسروں کا احترام کرے اور مذہبی نوعیت کے اشتعال انگیز بیانات دینے سے پرہیز کرے۔
مولانا خالد رشید فرنگی محلی نے مزید کہا کہ اتراکھنڈ میں مساجد کے انہدام کی تیز رفتار کارروائیاں اور مدرسہ بورڈ کے خاتمے سے مسلمانوں میں شدید بے چینی اور اضطراب پیدا ہوا ہے۔
ان کا یہ بیان بابا رام دیو کے حالیہ تبصرے کے بعد سامنے آیا ہے جس میں انہوں نے کہا تھا کہ "ہندو راشٹر" کے تصور سے کسی کو خوفزدہ ہونے کی ضرورت نہیں کیونکہ ہندوستان میں مسلمانوں اور عیسائیوں کو کوئی خطرہ نہیں ہے۔
بابا رام دیو نے یہ بھی کہا تھا کہ "ہمارے آباؤ اجداد ایک ہی ہیں" اور لوگوں کو اپنے آباؤ اجداد کی روایات اپنانے کی تلقین کی۔
انہوں نے کہا کہ ہری دوار کے قریب دیوبند واقع ہے جہاں انہیں 2009 میں مدعو کیا گیا تھا۔ وہاں انہوں نے کہا تھا کہ اگرچہ مذاہب مختلف ہو سکتے ہیں لیکن ہمارے آباؤ اجداد ایک ہیں۔ ان کے مطابق "ہندو راشٹر" کے تصور سے کسی کو خوفزدہ ہونے کی ضرورت نہیں۔ انہوں نے یہ بھی کہا کہ سب کے آباؤ اجداد سناتنی ہندو آریہ ویدک تھے۔ اگر کوئی پوچھتا ہے کہ ہندو راشٹر قائم ہونے کے بعد مسلمان کہاں جائیں گے تو وہ اپنے آباؤ اجداد کی روایات اختیار کریں۔ داڑھی رکھیں یا نہ رکھیں۔ کوئی بھی لباس پہنیں لیکن اپنے آباؤ اجداد جیسا کردار اپنائیں۔ ان کے بقول ہندوستان میں مسلمانوں اور عیسائیوں کو کسی قسم کا خطرہ نہیں ہے۔
