ممبئی: ممبئی میں کمپریسڈ نیچرل گیس (سی این جی) کی قیمت میں 2 روپے فی کلوگرام اضافے کے بعد ٹیکسی ڈرائیوروں نے بڑھتے ہوئے آپریٹنگ اخراجات پر تشویش کا اظہار کیا ہے۔ ان کا کہنا ہے کہ کرایوں میں کوئی اضافہ نہ ہونے کے باعث اس قیمت بڑھوتری سے ان کی آمدنی مزید متاثر ہوگی۔ مغربی ایشیا میں جاری تنازع کے سبب عالمی توانائی سپلائی کے حوالے سے خدشات کے درمیان ممبئی میں سی این جی کی خوردہ قیمت 86 روپے فی کلوگرام ہو گئی ہے۔

اس اضافے کے بعد ٹیکسی ڈرائیوروں میں بے چینی پائی جا رہی ہے۔ مقامی ٹیکسی ڈرائیور فیض خان نے اے این آئی سے گفتگو کرتے ہوئے کہا کہ سی این جی کی قیمتوں میں اضافے سے ڈرائیوروں کو مشکلات کا سامنا ہے کیونکہ ان کی آمدنی بڑھتے ہوئے اخراجات کے مطابق نہیں بڑھی۔

انہوں نے کہا: "میں صرف یہ کہنا چاہتا ہوں کہ اب اس سے بہت پریشانی ہو رہی ہے۔ پہلے سی این جی کی قیمت کم تھی اور اب بڑھ گئی ہے، لیکن ہمیں جو کرایہ ملتا تھا وہی آج بھی مل رہا ہے، کرایوں میں کوئی اضافہ نہیں ہوا۔ پہلے جتنا کام مل جاتا تھا، اب اتنا بھی نہیں ملتا اور اس کا نقصان ہم ڈرائیوروں کو اٹھانا پڑ رہا ہے۔" ایک اور ڈرائیور مان سنگھ نکم نے کہا کہ سی این جی کی قیمتوں میں بار بار اضافہ براہِ راست ان کے روزگار کو متاثر کر رہا ہے۔

انہوں نے کہا: "اگر حکومت اسی طرح مہنگائی بڑھاتی رہے گی تو ہم کیا کر سکتے ہیں؟ ایسا نہیں ہونا چاہیے۔ سی این جی کی قیمتیں پہلے ہی تین بار بڑھائی جا چکی ہیں، اب مزید اضافہ نہیں ہونا چاہیے۔ کرائے پہلے جیسے ہی ہیں، ان میں کوئی اضافہ نہیں ہوا، لیکن سی این جی کی قیمت مسلسل بڑھ رہی ہے۔

اس کا سیدھا اثر ہماری آمدنی پر پڑتا ہے۔ اگر ساری کمائی سی این جی پر خرچ ہو جائے تو ہماری اصل آمدنی وہی رہ جاتی ہے۔" اسی طرح کے خدشات کا اظہار کرتے ہوئے ڈرائیور شکیل احمد نے کہا کہ ایندھن کی بڑھتی ہوئی قیمتوں کے مقابلے میں مسافروں سے وصول کیے جانے والے کرایوں میں اضافہ نہیں ہوا۔

انہوں نے کہا:یقیناً یہ ہمارے لیے نقصان کا سودا ہے۔ پہلے قیمتیں کم تھیں اور اب بڑھ گئی ہیں۔ جب ہم مسافروں سے زیادہ کرایہ مانگتے ہیں تو وہ انکار کر دیتے ہیں اور ہمیں پرانے کرایے پر ہی کام کرنا پڑتا ہے۔ مسافر کرایہ بڑھانے کو تیار نہیں، لیکن گیس کی قیمت مسلسل بڑھ رہی ہے۔ اس کا مطلب یہ ہے کہ مہنگائی بڑھتی جا رہی ہے اور کم ہونے کا نام نہیں لے رہی۔