پٹنہ: پورنیہ کے رکنِ پارلیمنٹ پپو یادو کو منگل (10 فروری 2026) کو ایم پی–ایم ایل اے عدالت سے ضمانت مل گئی ہے۔ یہ ضمانت مکان کو مبینہ طور پر دھوکہ دہی کے ذریعے کرائے پر لینے اور اس پر قبضہ کرنے کے معاملے میں دی گئی ہے۔

مکان مالک نے گردنی باغ تھانے میں اس سلسلے میں مقدمہ درج کرایا تھا۔ اسی کیس میں تین دن قبل پپو یادو کو گرفتار کیا گیا تھا۔ اب یہ دیکھنا ہوگا کہ ان کی رہائی کب تک ممکن ہو پاتی ہے۔ جیل میں تمام قانونی کارروائی مکمل ہونے کے بعد اگر آج شام رہائی نہیں ہو پاتی تو کل تک اس کا امکان ہے۔

پپو یادو کی ضمانت کی درخواست پر سماعت گزشتہ پیر کو عدالت میں ملتوی ہو گئی تھی۔ اس کی وجہ سول کورٹ کو بم سے اڑانے کی دھمکی ملنا بتائی گئی تھی، جس کے باعث عدالتی کام کاج روک دیا گیا تھا۔ اگر پیر کو ہی ضمانت مل جاتی تو آج پپو یادو جیل سے باہر آ سکتے تھے۔

پپو یادو کو 31 سال پرانے ایک معاملے میں گرفتار کیا گیا تھا، جو سنہ 1995 سے متعلق ہے۔ عدالت کی جانب سے ان کے خلاف گرفتاری وارنٹ جاری کیا گیا تھا، جس کے بعد ایم پی–ایم ایل اے عدالت نے رکنِ پارلیمنٹ پپو یادو کے خلاف قرقی اور ضبطی کا بھی حکم صادر کیا تھا۔

قابلِ ذکر ہے کہ پپو یادو اس وقت بیؤر جیل میں قید ہیں اور جیل کے اسپتال وارڈ میں رکھا گیا ہے۔ پی ایم سی ایچ میں علاج کے بعد انہیں بیؤر جیل منتقل کیا گیا تھا۔ اب ان کے حامیوں کے لیے ایک اچھی خبر سامنے آئی ہے۔ دیکھنا یہ ہے کہ پپو یادو کب تک رہائی پا کر اپنے عزیزوں کے درمیان واپس آتے ہیں۔