اجین

 مدھیہ پردیش کے شہر اجین میں جمعہ کے روز شدید بارش کے باعث مختلف علاقوں میں بڑے پیمانے پر آبی جمعاؤ دیکھنے میں آیا۔مسلسل بارش کی وجہ سے شپرا ندی کی سطح میں اضافہ ہونے کے بعد رام گھاٹ کے قریب واقع متعدد مندر بھی زیر آب آ گئے۔

محکمہ موسمیات (آئی ایم ڈی) نے اپنے موسمی بلیٹن میں کہا ہے کہ آئندہ دو سے تین دنوں کے دوران جنوب مغربی مانسون کے شمالی بحیرہ عرب کے مزید حصوں، گجرات، مدھیہ پردیش کے باقی علاقوں، ہریانہ، پنجاب اور راجستھان کے کچھ مزید حصوں میں پیش قدمی کے لیے حالات سازگار ہیں۔

محکمہ موسمیات کے مطابق، شمال مغربی خلیج بنگال اور شمالی اڈیشہ-مغربی بنگال کے ساحلی علاقوں کے قریب کم دباؤ کا ایک نظام تشکیل پا چکا ہے۔ اس کے نتیجے میں آئندہ پانچ سے چھ دنوں کے دوران ملک کے وسطی علاقوں میں جنوب مغربی مانسون کے سرگرم رہنے کا امکان ہے۔

وسطی ہندوستان کے لیے جاری پیش گوئی کے مطابق، 2 جولائی سے 8 جولائی تک مشرقی اور مغربی مدھیہ پردیش میں کئی مقامات پر ہلکی سے شدید بارش ہونے کا امکان ہے۔آئی ایم ڈی نے کہا ہے کہ مغربی مدھیہ پردیش میں 2 اور 3 جولائی کے دوران بعض مقامات پر گرج چمک، آسمانی بجلی اور 30 سے 40 کلومیٹر فی گھنٹہ کی رفتار سے چلنے والی تیز ہواؤں، جن کی رفتار بعض اوقات 50 کلومیٹر فی گھنٹہ تک پہنچ سکتی ہے، کا امکان ہے۔ اسی طرح مشرقی مدھیہ پردیش میں بھی 2 اور 3 جولائی کو بعض مقامات پر گرج چمک اور آسمانی بجلی گرنے کی پیش گوئی کی گئی ہے۔

محکمہ موسمیات کے مطابق، مغربی مدھیہ پردیش میں 3 اور 4 جولائی کو جبکہ مشرقی مدھیہ پردیش میں 5 سے 8 جولائی کے دوران بعض مقامات پر شدید بارش ہو سکتی ہے۔مزید کہا گیا ہے کہ مشرقی مدھیہ پردیش میں 3 اور 4 جولائی کو بعض علاقوں میں انتہائی شدید بارش کا امکان ہے، جبکہ مغربی مدھیہ پردیش میں 5 سے 8 جولائی کے دوران کہیں کہیں بہت زیادہ بارش متوقع ہے۔

اس کے علاوہ، آئی ایم ڈی نے مغربی مدھیہ پردیش میں 3 اور 4 جولائی کو بعض مقامات پر شدید سے انتہائی شدید بارش اور کہیں کہیں غیر معمولی بارش ہونے کا انتباہ بھی جاری کیا ہے۔

یہ پیش گوئی ایسے وقت میں سامنے آئی ہے جب اجین کے کئی علاقے مسلسل بارش کے باعث آبی جمعاؤ اور شپرا ندی کی بڑھتی ہوئی سطح کے مسائل سے دوچار ہیں۔

دوسری جانب، مہاراشٹر میں بھی شدید بارش کا سلسلہ جاری ہے۔ برہن ممبئی میونسپل کارپوریشن (بی ایم سی) نے جمعہ کے روز ممبئی اور اس کے مضافاتی علاقوں میں شدید سے انتہائی شدید بارش اور 50 سے 60 کلومیٹر فی گھنٹہ کی رفتار سے چلنے والی تیز ہواؤں کی پیش گوئی کی ہے۔

بی ایم سی کے مطابق، 3 جولائی کی صبح 8 بجے تک گزشتہ 24 گھنٹوں کے دوران ممبئی شہر میں 126 ملی میٹر بارش ریکارڈ کی گئی، جبکہ مشرقی اور مغربی مضافاتی علاقوں میں بالترتیب 110 ملی میٹر اور 114 ملی میٹر بارش ہوئی۔

ادھر، آئی ایم ڈی کے ممبئی مرکز نے بھی اورنج وارننگ جاری کرتے ہوئے کہا ہے کہ آئندہ تین گھنٹوں کے دوران ممبئی، تھانے، پالگھر اور رائے گڑھ کے بعض علاقوں میں درمیانی سے شدید بارش ہو سکتی ہے، اور شہریوں کو ضروری احتیاطی تدابیر اختیار کرنے کا مشورہ دیا گیا ہے۔