نئی دہلی: دہلی کی وزیر اعلیٰ ریکھا گپتا نے جمعہ کو مشرقی ونود نگر اسپورٹس کمپلیکس میں منعقدہ تقریب کے دوران 'ودیا واہنی یوجنا' کے تحت نویں جماعت کی 3 ہزار سے زائد طالبات میں سائیکلیں تقسیم کیں۔ اس منصوبے کا مقصد طالبات کی اسکول تک رسائی آسان بنانا، حاضری میں اضافہ کرنا اور بچیوں کو بااختیار بنانا ہے۔ یہ مہم پہلے مرحلے کا حصہ ہے۔

وزیر اعلیٰ نے اعلان کیا کہ آئندہ ایک ماہ کے دوران مرحلہ وار سرکاری اسکولوں میں زیرِ تعلیم 1.40 لاکھ نویں جماعت کی طالبات کو سائیکلیں فراہم کی جائیں گی۔ ریکھا گپتا نے صحافیوں سے گفتگو کرتے ہوئے کہا، "یہ خوشی کا موقع ہے کہ دہلی حکومت سرکاری اسکولوں میں نویں جماعت میں داخل ہونے والی بیٹیوں کو سائیکلیں فراہم کر رہی ہے۔ ہر طالبہ کو سائیکل دے کر ہم نہ صرف اس کی تعلیم اور تحفظ کو فروغ دے رہے ہیں بلکہ 'ودیا واہنی یوجنا' کے ذریعے اسکول تک اس کا سفر بھی آسان بنا رہے ہیں۔

دہلی کی تمام بیٹیوں کو مبارک باد، حکومت ان کے ساتھ کھڑی ہے۔" انہوں نے سوشل میڈیا پلیٹ فارم ایکس پر بھی لکھا کہ: "آج 'ودیا واہنی یوجنا' کے تحت 3 ہزار سے زائد بیٹیوں کو سائیکلیں فراہم کر کے بے حد خوشی ہوئی۔ آپ سب پوری لگن سے تعلیم حاصل کریں، اپنے خواب پورے کریں اور دہلی، اپنے خاندان اور ملک کا نام روشن کریں۔"

وزیر اعلیٰ نے کہا کہ اس اسکیم کا مقصد تعلیم کی راہ میں حائل رکاوٹوں کو دور کرنا اور طالبات کے اعتماد میں اضافہ کرنا ہے۔ انہوں نے کہا، "ہمارا عزم ہے کہ یہ اسکیم سرکاری اسکولوں کی نویں جماعت کی 1.40 لاکھ سے زیادہ طالبات تک پہنچے۔ اس سائیکل سے بچیوں کے لیے اسکول جانا آسان ہوگا، حاضری بڑھے گی، تعلیم اور کھیلوں کے مزید مواقع میسر آئیں گے، خاندانوں کے اخراجات کم ہوں گے اور سب سے بڑھ کر ان کے اعتماد کو نئی پرواز ملے گی۔

" تقریب میں دہلی بی جے پی کے صدر اور مرکزی وزیر مملکت ہرش ملہوترا، کابینہ وزیر آشیش سود اور رکن اسمبلی رویندر نیگی سمیت کئی معزز شخصیات نے شرکت کی۔ یاد رہے کہ 26 جولائی کو دہلی حکومت نے وزیر اعلیٰ ریکھا گپتا کی ہدایت پر دہلی خواتین کمیشن (DCW) اور دہلی اقلیتی کمیشن (DMC) کی تشکیل بھی کی تھی۔

لتا گپتا کو دہلی خواتین کمیشن کی چیئرپرسن مقرر کیا گیا ہے، جبکہ شیام بالا، ملتی ورما، لتا سودھی، سانریکا شرما جھا اور رینو بھلا کو اس کے اراکین نامزد کیا گیا ہے۔ اسی طرح نرمل جین کو دہلی اقلیتی کمیشن کا چیئرپرسن اور کلدیپ سنگھ و محمد ہارون کو اس کے اراکین مقرر کیا گیا ہے۔

ریکھا گپتا نے کہا کہ ان اقدامات کا مقصد خواتین کے حقوق کا تحفظ، ان کو بااختیار بنانا، اقلیتی برادریوں کی فلاح و بہبود کو یقینی بنانا اور ان کے آئینی حقوق کا مؤثر تحفظ کرنا ہے۔ انہوں نے کہا کہ وزیر اعظم نریندر مودی کی قیادت میں ملک نے اچھی حکمرانی، خواتین کو بااختیار بنانے، سماجی انصاف اور ہمہ گیر ترقی کی سمت میں نئی پیش رفت کی ہے۔