نئی دہلی: دہلی حکومت نے بنیادی طبی سہولیات کو مزید مضبوط بنانے کی مہم کے تحت آیوشمان آروگیہ مندر منصوبے کے ساتویں مرحلے میں قومی دارالحکومت کے مختلف علاقوں میں مزید 45 آیوشمان آروگیہ مندر عوام کے نام وقف کرنے کا اعلان کیا ہے۔

سرکاری بیان کے مطابق ان نئے مراکز کے قیام سے دہلی میں جامع بنیادی صحت کی خدمات تک عوام کی رسائی مزید وسیع ہوگی۔ بیان میں کہا گیا ہے کہ اس سے قبل شہر میں 370 آیوشمان آروگیہ مندر فعال ہو چکے ہیں، جن میں 244 شہری ذیلی صحت مراکز اور 126 شہری بنیادی صحت مراکز شامل ہیں۔

نئے آیوشمان آروگیہ مندروں میں زچہ و بچہ کی صحت، حفاظتی ٹیکہ کاری، غیر متعدی بیماریوں کی جانچ اور علاج، عام بیماریوں کا علاج، ضروری ادویات، تشخیصی سہولیات، صحت کے فروغ اور فلاحی پروگرام جیسی خدمات فراہم کی جائیں گی۔ دہلی کے وزیر صحت پنکج سنگھ نے کہا کہ ان نئے مراکز کے قیام سے عوام کو ان کے گھروں کے قریب ضروری طبی سہولیات دستیاب ہوں گی، جہاں احتیاطی، فروغی اور جامع بنیادی صحت کی خدمات پر خصوصی توجہ دی جائے گی۔

انہوں نے کہا، "مزید 45 آیوشمان آروگیہ مندروں کا عوام کے نام وقف کیا جانا اس بات کا ایک اور اہم سنگِ میل ہے کہ دہلی کے ہر شہری کو معیاری، سستی اور مساوی طبی سہولیات فراہم کی جائیں۔" وزیر صحت نے کہا کہ یہ مراکز جامع بنیادی صحت کی خدمات کا پہلا رابطہ مرکز ہوں گے، جہاں بیماریوں کی روک تھام، بروقت تشخیص اور وقت پر علاج کو ترجیح دی جائے گی۔

حکومت نے کہا ہے کہ وہ آئندہ بھی دہلی میں صحت کے بنیادی ڈھانچے کو مزید مضبوط بنانے، سرکاری طبی اداروں کو جدید بنانے اور معیاری طبی خدمات تک عوام کی رسائی بڑھانے کے لیے اپنی کوششیں جاری رکھے گی۔