ممبئی: مون سون کی موسلا دھار بارشوں نے اتوار کو ممبئی سمیت ملک کے مختلف حصوں میں شدید تباہی مچادی۔ کئی علاقوں میں پانی جمع ہوگیا، جانی نقصان کے واقعات پیش آئے اور حکام نے حفاظتی اقدامات سخت کرتے ہوئے ممبئی میں پیر کے روز تمام اسکولوں اور کالجوں میں تعطیل کا اعلان کردیا۔

بریہن ممبئی میونسپل کارپوریشن (بی ایم سی) کے مطابق گزشتہ 24 گھنٹوں کے دوران شام 6 بجے تک ممبئی شہر میں 265 ملی میٹر سے زائد جبکہ مضافاتی علاقوں میں 227 ملی میٹر سے زیادہ بارش ریکارڈ کی گئی۔

نوی ممبئی کے چرنیر گاؤں میں شدید پانی جمع ہونے کی اطلاعات ہیں، جہاں مقامی افراد کا کہنا ہے کہ صرف ہفتے کے روز 10 سے 12 سانپ مارے گئے۔ ایک رہائشی نے بتایا کہ وہ گزشتہ دو دن سے پانی میں پھنسے ہوئے ہیں اور ابھی تک کوئی سرکاری اہلکار ان کی مدد کے لیے نہیں پہنچا۔

ممبئی کے علاقے کرلا میں تیز ہواؤں اور شدید بارش کے دوران ایک درخت دکان پر گرنے سے 63 سالہ یونس کنداوالہ جاں بحق ہوگئے۔ انہیں فوری طور پر فوزیہ اسپتال منتقل کیا گیا، جہاں ڈاکٹروں نے انہیں مردہ قرار دے دیا۔

یہ حادثہ کرلا (مغرب) کے کامانی علاقے میں ہندی بی ایم سی اسکول کے قریب پیش آیا، جہاں ریسکیو کارروائی کے لیے فائر بریگیڈ، پولیس، بیسٹ اور بی ایم سی کی ٹیمیں موقع پر پہنچ گئیں۔

ممبئی کی میئر ریتو تاوڑے نے متاثرہ خاندان کے لیے پانچ لاکھ روپے مالی امداد کا اعلان کرتے ہوئے واقعے کی تحقیقات کا حکم دیا۔ انہوں نے کہا کہ یہ جانچا جائے گا کہ متعلقہ درخت کو پہلے سے خطرناک کیوں قرار نہیں دیا گیا۔

میئر نے بتایا کہ بی ایم سی نے شہر بھر میں پرانے اور سڑکوں کے کنارے موجود درختوں کا خصوصی سروے کرنے کے ساتھ ساتھ مین ہولز کی بھی جانچ کا حکم دیا ہے تاکہ ان کے ڈھکن اور حفاظتی جالیاں درست حالت میں ہوں۔

انہوں نے شہریوں سے اپیل کی کہ شدید بارش، تیز ہواؤں اور سمندر میں مدوجزر کی صورتحال کے پیش نظر غیر ضروری طور پر گھروں سے باہر نہ نکلیں، خصوصاً سمندر کے کنارے جانے سے گریز کریں۔

بھارتی محکمہ موسمیات (آئی ایم ڈی) کی جانب سے پیر کے لیے ممبئی میں اورنج الرٹ جاری کیے جانے کے بعد بی ایم سی نے 6 جولائی کو تمام سرکاری، نجی اور میونسپل اسکولوں اور کالجوں میں تعطیل کا اعلان کردیا، تاہم سرکاری اور نجی دفاتر معمول کے مطابق کھلے رہیں گے۔

یہ تازہ حادثہ دو روز قبل پیش آنے والے اس واقعے کے بعد سامنے آیا ہے، جس میں 55 سالہ اسلم اسحاق شیخ اندھیری ایسٹ کے ساکی ناکہ علاقے میں بارش کے دوران کھلے مین ہول میں گر کر جاں بحق ہوگئے تھے۔ اس معاملے میں پولیس نے نکاسی آب کے کام سے وابستہ ٹھیکیدار اور مزدوروں کے خلاف مقدمہ درج کیا ہے۔

شدید بارشوں سے پالگھر ضلع کا نالاسوپارا علاقہ بھی زیر آب آگیا، جس کے باعث شہریوں کو گھٹنوں تک پانی میں چل کر سفر کرنا پڑا اور معمولات زندگی بری طرح متاثر ہوئے۔

ادھر جھارکھنڈ کے شہر رانچی میں بھی مسلسل بارش کے باعث متعدد علاقوں میں پانی جمع ہوگیا۔ میئر روشنی خالخو نے کہا کہ مالی وسائل کی کمی کے باوجود میونسپل کارپوریشن صفائی اور مون سون کی تیاریوں کے لیے بھرپور کوشش کر رہی ہے۔

اتر پردیش کے ہاپوڑ میں بھی دہلی-لکھنؤ شاہراہ شدید بارش کے باعث زیر آب آگئی، جس سے ٹریفک کی روانی متاثر ہوئی اور مسافروں کو مشکلات کا سامنا کرنا پڑا۔

چھتیس گڑھ کے ضلع گریابند میں سیلابی پانی میں پھنسے 14 مزدوروں کو پولیس اور ہوم گارڈز کی مشترکہ کارروائی کے ذریعے بحفاظت نکال لیا گیا۔ حکام کے مطابق مسلسل بارش سے دریائے بگنئی میں پانی کی سطح اچانک بلند ہوگئی تھی، جس کے باعث زیر تعمیر پل کے نیچے قائم عارضی رہائش گاہ میں موجود مزدور پھنس گئے تھے۔ بروقت ریسکیو آپریشن کے باعث ایک بڑا حادثہ ٹل گیا۔