نئی دہلی/ آواز دی وائس
منگولیا کے صدر خریلسُخ اُخنا نے منگل کے روز راج گھاٹ پر حاضری دی، پھولوں کی چادر چڑھائی اور مہاتما گاندھی کو خراجِ عقیدت پیش کیا۔ اس موقع پر انہوں نے مہمانوں کی کتاب پر دستخط کیے اور انہیں مہاتما گاندھی کا ایک مجسمہ اور ایک کتاب پیش کی گئی۔ اُخنا پیر کے روز چار روزہ سرکاری دورے پر دہلی پہنچے تھے، جہاں شہری ہوابازی کے وزیرِ مملکت مُرلی دھر موہول نے ان کا خیرمقدم کیا۔
پیر کے روز ہندوستان کے وزیرِ خارجہ ایس۔ جے شنکر نے منگولیا کے صدر خریلسُخ اُخنا سے ملاقات کی اور دونوں ممالک کے درمیان اسٹریٹیجک شراکت داری کو مزید مضبوط کرنے پر ان کے "خلوصِ نیت" کی تعریف کی۔ جے شنکر نے یقین ظاہر کیا کہ اُخنا اور وزیرِاعظم نریندر مودی کے درمیان منگل کو ہونے والی گفتگو آئندہ دہائی کے لیے دوطرفہ دوستی کے ایک نئے اور مثبت باب کا آغاز کرے گی۔
وزارتِ خارجہ کے ترجمان رندھیر جیسوال نے ایکس (سابق ٹوئٹر) پر لکھا کہ ہمارے ممالک کے درمیان گہرے تہذیبی رشتوں کو مزید مضبوط کرتے ہوئے، منگولیا کے صدر محترم خریلسُخ اُخنا سرکاری دورے پر نئی دہلی پہنچ گئے ہیں۔ انہیں ہوائی اڈے پر گارڈ آف آنر اور روایتی استقبالیہ دیا گیا۔ شہری ہوابازی کے وزیرِ مملکت مُرلی دھر موہول نے گرمجوشی سے ان کا استقبال کیا۔
اُخنا کے ہمراہ ایک اعلیٰ سطحی وفد بھی آیا ہے، جس میں کابینہ کے وزراء، پارلیمنٹ کے اراکین، سینئر عہدیداران، کاروباری رہنما اور ثقافتی نمائندے شامل ہیں۔ یہ منگولیا کے صدر کے طور پر اُخنا کا ہندوستان کا پہلا دورہ ہے۔
ہندوستان اور منگولیا کے درمیان سفارتی تعلقات 1955 میں قائم ہوئے تھے۔ گزشتہ سات دہائیوں میں دونوں ممالک نے مشترکہ ثقافتی اور روحانی ورثے اور جمہوری اقدار کی بنیاد پر ایک قریبی اور کثیرالجہتی شراکت داری کو فروغ دیا ہے۔ یہ شراکت داری دفاع و سلامتی، پارلیمانی روابط، ترقیاتی تعاون، توانائی، کان کنی، انفارمیشن ٹیکنالوجی، تعلیم، صحت عامہ اور ثقافتی تبادلوں جیسے مختلف شعبوں پر محیط ہے۔
