نئی دہلی وزیراعظم نریندر مودی نے منگل کے روز ہُل دیوس کے موقع پر سنتھال بغاوت کے بہادر مجاہدین کو خراجِ عقیدت پیش کرتے ہوئے کہا کہ یہ دن ملک کے قبائلی معاشرے کی اس عظیم روح کا طاقتور مظہر ہے جو مادرِ وطن کے لیے جان قربان کرنے کا جذبہ رکھتی ہے۔

ہر سال 30 جون کو ہُل دیوس 1855 کی سنتھال بغاوت (سنتھال ہُل) کی یاد میں منایا جاتا ہے، جو برطانوی نوآبادیاتی حکمرانوں کے ظلم و استحصال کے خلاف ایک تاریخی تحریک تھی۔ وزیراعظم مودی نے سوشل میڈیا پلیٹ فارم ایکس پر اپنے پیغام میں کہا: "ہُل دیوس ہمارے قبائلی معاشرے کی اس غیر معمولی روح کی علامت ہے جو وطنِ عزیز کے لیے جان نچھاور کرنے کو تیار رہتی ہے۔

ہندوستان کی تاریخ کے اس عظیم موقع پر میں ان تمام بہادر مجاہدین—سیدو، کانہو، چاند، بھیرَو، پھولو اور جھانو—کو عقیدت کے ساتھ خراجِ تحسین پیش کرتا ہوں جنہوں نے غیر ملکی حکمرانی کے ظلم کے خلاف ڈٹ کر مقابلہ کیا۔" انہوں نے کہا کہ قبائلی وقار اور عزت کے تحفظ کے لیے ان مجاہدین کی جدوجہد اور قربانیوں کی داستان ہمیشہ ملک کے عوام کے دلوں میں نئی توانائی اور جذبہ پیدا کرتی رہے گی۔ واضح رہے کہ 1855 میں چھوٹا ناگپور کے علاقے میں ہونے والی سنتھال بغاوت کو 1857 کی جنگِ آزادی سے قبل برطانوی اقتدار کے خلاف ہونے والی اہم ترین عوامی بغاوتوں میں شمار کیا جاتا ہے۔