نئی دہلی

مرکزی وزیر برائے سائنس و ٹیکنالوجی جتیندر سنگھ رانا نے ہفتہ کے روز خلائی شعبے، جوہری توانائی اور سائنس و ٹیکنالوجی کے میدان میں حکومت کی پہلوں کو ’’کامیاب‘‘ قرار دیا۔ انہوں نے کہا کہ اگرچہ راستے میں کچھ رکاوٹیں آئیں، لیکن بعد کے نتائج نے بڑی کامیابیاں حاصل کرکے دکھائیں۔ اے این آئی کو دیے گئے ایک انٹرویو میں جتیندر سنگھ نے اپنے دورِ کارکردگی کو کامیاب بتایا۔’’ہٹ یا مس‘‘ (کامیابی یا ناکامی) کے بارے میں پوچھے گئے سوال کے جواب میں انہوں نے کہا کہ یقیناً یہ ایک کامیابی ہے، اور اگر کہیں کوئی کمی یا چوک بھی ہوئی ہے تو اگلا قدم اس سے بھی بڑی کامیابی لے کر آیا ہے۔

ہندوستان کے خلائی سفر کا ذکر کرتے ہوئے انہوں نے چندریان پروگرام کی مثال دی اور کہا کہ ملک نے ابتدائی رکاوٹوں پر قابو پاتے ہوئے چاند کی تحقیق میں تاریخی کامیابی حاصل کی ہے۔

انہوں نے کہا، ’’چندریان مشن کے دوران دوسری کوشش میں ہمیں مطلوبہ نتائج حاصل نہیں ہوئے تھے، لیکن تیسری کوشش میں ہم چاند کے جنوبی قطب پر کامیابی سے اترنے والے دنیا کے پہلے ملک بن گئے۔

انہوں نے مزید کہا کہ امریکہ اور روس کے مقابلے میں دیر سے آغاز کرنے کے باوجود خلائی تحقیق کے میدان میں ہندوستان کی پیش رفت وزیر اعظم نریندر مودی کی قیادت میں مسلسل پالیسی اقدامات کا نتیجہ ہے۔ جتیندر سنگھ نے سائنسی سوچ کو فروغ دینے اور ہندوستان کے تحقیقی نظام کو عالمی معیار کے مطابق بنانے کا سہرا بھی وزیر اعظم مودی کو دیا۔

وزیر نے جوہری شعبے میں لبرلائزیشن (آزادانہ پالیسیوں) پر بھی زور دیتے ہوئے کہا کہ اس کا مقصد ترقی کی رفتار کو بڑھانا اور اسٹریٹجک شعبوں میں نجی شراکت داری کی حوصلہ افزائی کرنا ہے۔جوہری توانائی میں اصلاحات اور نجی شعبے کی شمولیت کے بارے میں بات کرتے ہوئے انہوں نے کہا کہ اس شعبے کو کھولنے کے مثبت اثرات اب ظاہر ہونے لگے ہیں۔

انہوں نے کہا کہ اب یہ تقریباً 9 بلین تک پہنچ چکا ہے، اور یہ ملک کی مجموعی ترقی کی شرح میں اہم کردار ادا کرے گا۔انہوں نے مزید بتایا کہ قواعد و ضوابط میں نرمی کے باعث سائنس اور خلائی ٹیکنالوجی کے شعبوں میں براہِ راست غیر ملکی سرمایہ کاری  بھی آ رہی ہے۔حال ہی میں منظور کیے گئے ’سسٹینیبل ہارنیسنگ اینڈ ایڈوانسمنٹ آف نیوکلیئر انرجی فار ٹرانسفارمنگ انڈیا‘  بل کے ذریعے سخت قومی سلامتی اور حفاظتی ضوابط کے تحت مشترکہ منصوبوں (جوائنٹ وینچرز) اور نجی کمپنیوں کی شمولیت کی راہیں ہموار کی گئی ہیں۔

 شانتی بل جوہری توانائی اور آئنائزنگ ریڈی ایشن  کے فروغ اور ترقی سے متعلق دفعات فراہم کرتا ہے۔ اس کا استعمال جوہری بجلی کی پیداوار، صحت کی دیکھ بھال، خوراک، پانی، زراعت، صنعت، تحقیق، ماحولیات اور جوہری سائنس و ٹیکنالوجی میں اختراعات کے لیے کیا جائے گا۔

اس قانون کا مقصد ہندوستان کے عوام کی فلاح و بہبود کے لیے جوہری توانائی کے محفوظ استعمال کو یقینی بنانا اور اس کے لیے ایک مضبوط ضابطہ جاتی ڈھانچہ تیار کرنا ہے، ساتھ ہی اس سے متعلق دیگر امور کو بھی منظم کرنا ہے۔توانائی کے تحفظ کے موضوع پر گفتگو کرتے ہوئے جتیندر سنگھ نے کہا کہ ہندوستان بیرونی ذرائع پر انحصار کم کرنے اور صاف توانائی کو تیزی سے اپنانے کی سمت میں کام کر رہا ہے۔

انہوں نے اندازہ ظاہر کیا کہ سال 2047 تک ملک کی بجلی کی پیداوار میں جوہری توانائی کا حصہ تقریباً 15 فیصد ہوگا، جبکہ قابلِ تجدید توانائی کا حصہ تقریباً 75 فیصد تک پہنچ جائے گا۔ اس کے علاوہ سمندری توانائی  کے شعبے میں بھی تنوع پیدا ہوگا۔ریسرچ اینڈ ڈیولپمنٹ  پر اخراجات کے حوالے سے اٹھائے جانے والے خدشات پر انہوں نے کہا کہ 2014 کے بعد سے ہندوستان کا مجموعی آر اینڈ ڈی خرچ دوگنا ہو چکا ہے۔

انہوں نے مزید کہا کہ امریکہ اور چین کے ساتھ موازنہ کرتے وقت ان ممالک کے مضبوط نجی شعبے اور فلاحی اداروں کی جانب سے دی جانے والی مالی معاونت کو بھی مدِنظر رکھنا چاہیے۔

گگن یان مشن کے بارے میں بات کرتے ہوئے جتیندر سنگھ نے کہا کہ اس پروگرام کے تحت اگلے سال کم از کم ایک خلا باز کو خلا میں بھیجنے کی کوششیں جاری ہیں۔جموں و کشمیر کا ذکر کرتے ہوئے وزیر نے کہا کہ چھوٹے شہروں کے طلبہ کی سوچ میں نمایاں تبدیلی آئی ہے اور ان کی امیدیں اور خواہشات پہلے سے کہیں زیادہ بڑھی ہیں۔ انہوں نے ہندوستان میں ہونے والی ترقی کا موازنہ پاکستان کے زیرِ قبضہ کشمیر سے بھی کیا۔

سیاسی جماعتوں کے بارے میں تبصرہ کرتے ہوئے جتیندر سنگھ نے کہا کہ کیڈر پر مبنی جماعتیں عموماً زیادہ استحکام کا مظاہرہ کرتی ہیں، جبکہ خاندانی بنیادوں پر قائم سیاسی جماعتوں کو طویل مدت تک برقرار رہنے اور اندرونی اتحاد کو مضبوط رکھنے میں اکثر مشکلات کا سامنا کرنا پڑتا ہے۔