نئی دہلی: وزیراعظم نریندر مودی نے بھارتیہ جنتا پارٹی (بی جے پی) کے نو مقرر کردہ قومی عہدیداروں کو مبارکباد دیتے ہوئے امید ظاہر کی ہے کہ نئی ٹیم پارٹی کو مضبوط بنانے اور عوامی خدمت پر توجہ مرکوز کرنے کے لیے کام کرے گی۔ وزیراعظم نے ایکس پر کہا کہ نئی ٹیم میں تنظیمی تجربے، نوجوان توانائی اور زمینی سطح سے جڑے رہنماؤں کا امتزاج ہے۔

مودی نے لکھا، ’’بی جے پی کے نو مقرر کردہ قومی عہدیداروں اور پارٹی میں مختلف ذمہ داریاں سنبھالنے والے تمام رہنماؤں کو مبارکباد۔ نئی ٹیم میں تنظیمی تجربے، توانائی اور زمینی سطح سے مضبوط رابطے کا امتزاج ہے۔‘‘ انہوں نے مزید کہا، ’’مجھے یقین ہے کہ وہ پارٹی کو مضبوط بنانے اور عوامی خدمت پر توجہ مرکوز کرنے کے لیے اپنی پوری صلاحیت سے کام کریں گے۔ میری نیک خواہشات ان کے ساتھ ہیں۔‘‘

اس سے قبل پیر کو بی جے پی نے اپنی نئی قومی ٹیم کا اعلان کیا، جس میں نئے، نوجوان اور تجربہ کار رہنماؤں کو شامل کیا گیا ہے۔ پارٹی کی نئی ٹیم میں خواتین کو بھی نمایاں نمائندگی دی گئی ہے۔ بی ایل سنتوش کو قومی جنرل سکریٹری (تنظیم) کے عہدے پر برقرار رکھا گیا ہے۔ سابق امیٹھی رکنِ پارلیمنٹ اسمرتی ایرانی، تریپورہ کے سابق وزیراعلیٰ بپلپ دیب، سنیل بنسل، ونود تاؤڑے، گجیندر پٹیل، ستیش پونیا، ہریش دویویدی اور سنجے بھاٹیہ کو قومی جنرل سکریٹری کی اہم ذمہ داریاں سونپی گئی ہیں۔ یہ اعلان نتن نبیّن کے پارٹی صدر بننے کے تقریباً چھ ماہ بعد کیا گیا ہے۔ پارٹی نے کئی سینئر رہنماؤں کو قومی نائب صدور بھی مقرر کیا ہے۔

ان میں راجستھان کی سابق وزیراعلیٰ وسندھرا راجے، اتراکھنڈ کے سابق وزیراعلیٰ تیرتھ سنگھ راوت، رام مادھو، وجے جے پانڈا، ڈی. پروندیشوری، ریکھا ورما، ورشا بین نریندربھائی دوشی، بھارتی پروین پوار، من پریت سنگھ بادل، لال سنگھ آریہ، پروفیسر ایم. ناگراج، پروفیسر طارق منصور اور مدھو چندرا کار شامل ہیں۔ ان 13 نائب صدور میں سے چھ خواتین ہیں۔ قومی سکریٹریوں میں کویتا پاٹیدار، کے. سریندرن، ڈاکٹر بھولا سنگھ، پردیپ ورما، جگدیش ایشور بھائی پٹیل، سندیپ پاٹھک، فینگنون کونیاک، سنگیتا یادو، انیل اینٹونی، ایم. وینکٹیشن، منوج تگّا، سدھارتھ شمبھو، سوا دیش سنگھ، مرگنکا دیو برمن، روہن گپتا اور جے پرکاش شامل ہیں۔

پیوش گوئل کو ایک بار پھر پارٹی کا قومی خزانچی مقرر کیا گیا ہے۔ راجیہ سبھا کے رکن ترون چُگ کو مرکزی دفتر کا انچارج بنایا گیا ہے۔ گجرات سے رکنِ پارلیمنٹ ہیمنت جوشی کو یوا مورچہ کی ذمہ داری سونپی گئی ہے، جبکہ چھتیس گڑھ کی روپ کماری چودھری خواتین مورچہ کی نگرانی کریں گی۔ لوک سبھا رکن انیل بلونی میڈیا کنوینر کے عہدے پر برقرار رہیں گے۔ آشیش اوشا اگروال، پردیپ بھنڈاری اور سدھارتھ یادو کو شریک کنوینر مقرر کیا گیا ہے۔ چھتیس گڑھ کے دیپک مہاسکے کو سوشل میڈیا کنوینر بنایا گیا ہے۔