رام نگر/ آواز دی وائس 

کرناٹک کانگریس کے رکنِ اسمبلی اقبال حسین نے کہا ہے کہ پارٹی کے کم از کم 80 ارکانِ اسمبلی نے نائب وزیر اعلیٰ ڈی کے شیوکمار کا نام وزیر اعلیٰ کے عہدے کے لیے ہائی کمان کو بھیجا ہے۔

پیر کے روز اقبال حسین نے کانگریس کے رکنِ قانون ساز کونسل یتھندرا سدارامیاہ پر تنقید کی اور ان سے مطالبہ کیا کہ وہ نظم و ضبط کا مظاہرہ کریں۔ یتھندرا سدارامیاہ، وزیر اعلیٰ سدارامیاہ کے صاحبزادے ہیں۔

اقبال حسین نے کہا كہ ہم نے معاملہ ہائی کمان پر چھوڑ دیا ہے۔ 80 سے 90 ایم ایل ایز نے ہائی کمان سے درخواست کی ہے کہ ڈی کے شیوکمار کو وزیر اعلیٰ کے عہدے کا موقع دیا جائے۔ ہم ایک منظم اور باوقار پارٹی ہیں اور ہمیں شائستگی کے ساتھ برتاؤ کرنا چاہیے۔ ہمیں یہ پسند نہیں کہ یتھندرا سدارامیاہ بار بار اپنے والد کے حق میں بیان دے کر ہائی کمان کو شرمندہ کریں۔ ہر باپ اپنے بیٹے سے محبت کرتا ہے اور ہر بیٹا اپنے باپ سے، لیکن سیاست میں ہمیں نظم و ضبط کے ساتھ کام کرنا ہوتا ہے۔ اس طرح کے بیانات دے کر دوسروں کو اکسانا نہیں ہونا چاہیے۔

انہوں نے مزید کہا كہ ہم سب کے دل میں یہی بات ہے کہ ڈی کے شیوکمار کو موقع دیا جائے۔ سب یہی چاہتے ہیں، لیکن کسی قسم کی الجھن پیدا نہ ہو، اسی لیے اکثر لوگ خاموش ہیں اور کچھ آپس میں بات کر رہے ہیں۔ میں کھلے دل سے صاف کہہ رہا ہوں، جیسا کہ میں نے پہلے دن سے کہا ہے کہ اسی مدتِ حکومت میں ڈی کے شیوکمار کو وزیر اعلیٰ بننے کا موقع ملنا چاہیے، یہی میری خواہش ہے۔

کانگریس کے رکنِ قانون ساز کونسل چنّراج ہٹی ہولی نے بھی کہا كہ میری خواہش ہے کہ اسی مدت میں جلد ہی ڈی کے شیوکمار وزیر اعلیٰ بنیں۔ گزشتہ ہفتے یتھندرا سدارامیاہ نے مبینہ طور پر کہا تھا کہ کانگریس ہائی کمان نے سدارامیاہ کو پوری مدت تک وزیر اعلیٰ بنے رہنے کی ہری جھنڈی دے دی ہے۔ اپنے والد کے حق میں دیے گئے یتھندرا کے بیان پر ردِعمل ظاہر کرتے ہوئے ڈی کے شیوکمار نے کہا كہ میں ان کی ہر بات کو احترام کے ساتھ قبول کرتا ہوں۔ چونکہ انہوں نے اس طرح بات کی ہے جیسے وہ خود ہائی کمان ہوں، تو ہمیں بھی انہیں اسی حیثیت سے قبول کر لینا چاہیے۔

کرناٹک کانگریس کے اندر قیادت کی کشمکش کا آغاز نومبر 2025 میں ہوا تھا، جب حکومت نے اپنی پانچ سالہ مدت کا نصف سفر طے کر لیا تھا۔ وزیر اعلیٰ سدارامیاہ اور نائب وزیر اعلیٰ ڈی کے شیوکمار کے ساتھ ساتھ وزیر داخلہ جی پرمیشورا بھی اعلیٰ عہدے کی دوڑ میں شامل ہیں۔