نئی دہلی

وزارت داخلہ (ایم ایچ اے) نے شہریت (ترمیمی) قواعد 2026 کو نوٹیفائی کر دیا ہے، جس کے تحت شہریت قواعد 2009 میں ترمیم کرتے ہوئے اوورسیز سٹیزن آف انڈیا (او سی آئی) خدمات اور درخواست کے طریقۂ کار سے متعلق نئی دفعات متعارف کرائی گئی ہیں۔

وزارت کے مطابق اب او سی آئی کی درخواستیں لازمی طور پر آن لائن جمع کرانی ہوں گی، جبکہ فزیکل او سی آئی کارڈ اور ای-او سی آئی دستاویزات دونوں کی سہولت فراہم کی جائے گی۔ نئے ضابطوں کے تحت کسی نابالغ کو بیک وقت ہندوستانی اور غیر ملکی پاسپورٹ رکھنے کی اجازت نہیں ہوگی۔

او سی آئی کارڈ ہولڈرز کو ہندوستانی نژاد افراد اور ان کے شریک حیات کے لیے تاحیات، ملٹی انٹری اور کثیر المقاصد ویزا فراہم کیا جاتا ہے، جس کے ساتھ کچھ معاشی اور تعلیمی سہولیات بھی دی جاتی ہیں۔تاہم حکومت نے واضح کیا ہے کہ او سی آئی اسٹیٹس کے تحت سیاسی حقوق حاصل نہیں ہوتے، جیسے ووٹ ڈالنے کا حق یا آئینی عہدوں پر فائز ہونے کی اجازت۔

حکومت کا کہنا ہے کہ او سی آئی اسٹیٹس ایک سہولت ہے، کوئی بنیادی حق نہیں، اور اگر کوئی فرد ہندوستانی قوانین کی خلاف ورزی کرے تو اس کا او سی آئی درجہ منسوخ کیا جا سکتا ہے۔

او سی آئی اسکیم پہلی بار 2005 میں شہریت ایکٹ 1955 میں ترمیم کے ذریعے متعارف کرائی گئی تھی۔ اس کے تحت ہندوستانی نژاد افراد کو اوورسیز سٹیزن آف انڈیا کے طور پر رجسٹر ہونے کی اجازت دی جاتی ہے، بشرطیکہ وہ 26 جنوری 1950 کے بعد ہندوستان کے شہری رہے ہوں یا اس تاریخ کو شہریت کے اہل ہوں۔ تاہم ایسے افراد اس اسکیم کے اہل نہیں ہیں جو پاکستان یا بنگلہ دیش کے شہری رہے ہوں یا جن کے والدین، دادا دادی یا پردادا پردادی ان ممالک کے شہری رہے ہوں۔

حالیہ برسوں میں وزارت داخلہ نے او سی آئی رجسٹریشن سے متعلق قواعد کو مزید سخت کیا ہے۔ گزشتہ سال 11 اگست کو جاری نوٹیفکیشن کے مطابق اگر کسی شخص کو دو سال یا اس سے زیادہ قید کی سزا سنائی جاتی ہے یا اس پر ایسے جرم میں چارج شیٹ داخل ہوتی ہے جس کی سزا سات سال یا اس سے زیادہ قید ہو سکتی ہے، تو اس کا او سی آئی رجسٹریشن منسوخ کیا جا سکتا ہے۔

یہ نوٹیفکیشن شہریت ایکٹ 1955 کی دفعہ 7D کی شق (da) کے تحت دیے گئے اختیارات کا استعمال کرتے ہوئے جاری کیا گیا۔نوٹیفکیشن میں کہا گیا ہے کہ شہریت ایکٹ 1955 کی دفعہ 7 ڈی  کی شق کے تحت حاصل اختیارات کا استعمال کرتے ہوئے مرکزی حکومت یہ واضح کرتی ہے کہ اگر کسی او سی آئی رجسٹریشن رکھنے والے فرد کو کم از کم دو سال قید کی سزا سنائی جاتی ہے یا اس پر ایسے جرم میں فرد جرم عائد ہوتی ہے جس کی سزا سات سال یا اس سے زیادہ قید ہو سکتی ہے، تو اس کی او سی آئی رجسٹریشن منسوخ کی جا سکتی ہے۔

یہ نئے قواعد او سی آئی درخواست کے عمل کو آسان اور منظم بنانے کے ساتھ ساتھ شہریت کے نظام میں قانونی تعمیل اور سیکیورٹی سے متعلق ضوابط کو مزید مضبوط کرنے کے لیے متعارف کرائے گئے ہیں۔