احمد آباد
ممبئی-احمد آباد بلیٹ ٹرین منصوبے کے تحت کالوپور فلائی اوور کے اوپر وایاڈکٹ (پل) کی تعمیر کا کام کامیابی کے ساتھ مکمل کر لیا گیا ہے۔ یہ فلائی اوور احمد آباد ضلع میں سابرمتی-ممبئی مرکزی ریلوے لائن (مغربی ریلوے) کے اوپر واقع ایک ریلوے اوور برج (آر او بی) ہے۔
ایک سرکاری بیان کے مطابق یہ وایاڈکٹ موجودہ ریلوے لائن کے متوازی تعمیر کیا گیا ہے اور فلائی اوور کے اوپر اس کی تعمیر کا کام پیر کے روز مکمل کیا گیا۔ اس منصوبے میں "اسپین بائی اسپین" (ایس بی ایس) طریقہ استعمال کرتے ہوئے 45 میٹر طویل پل نصب کیا گیا۔
بیان کے مطابق اس پل کی نمایاں خصوصیات میں فلائی اوور کے اوپر 45 میٹر لمبا اسپین، زمین سے ریل کی سطح تک 19.5 میٹر بلند وایاڈکٹ، 19 سیگمنٹس اور تقریباً 1200 میٹرک ٹن وزنی اسپین شامل ہیں۔بیان میں کہا گیا ہے کہ کالوپور فلائی اوور احمد آباد کے مصروف ترین دو رویہ فلائی اوورز میں شمار ہوتا ہے۔ یہ شاہی باغ، اثروا اور کالوپور کے درمیان رابطے کا ایک اہم ذریعہ ہے اور روزانہ ہزاروں مسافر اس سے استفادہ کرتے ہیں۔
اسپین نصب کرنے کا کام انتہائی احتیاط کے ساتھ منصوبہ بندی کے تحت انجام دیا گیا اور رات کے وقت ٹریفک بند کر کے مکمل کیا گیا۔کام کے مقام پر رات 12 بجے سے صبح 6 بجے تک آمد و رفت کے تمام راستے مکمل طور پر بند رکھے گئے، جبکہ دن کے اوقات میں فلائی اوور کے نیچے معمول کے مطابق ٹریفک جاری رہی۔اس مقصد کے لیے 22 سے 25 مئی 2026 تک رات کے اوقات میں ٹریفک بند رکھنے کی ضروری اجازت احمد آباد ٹریفک پولیس سے حاصل کی گئی تھی۔
اس محدود وقت کے دوران آٹو لانچنگ، سیگمنٹس کی منتقلی، اسپین کی تنصیب، ڈرائی میچنگ اور گلونگ جیسے تمام اہم کام صرف تین راتوں میں کامیابی سے مکمل کر لیے گئے۔بیان میں مزید کہا گیا کہ عوام کو کم سے کم پریشانی پہنچانے کے لیے تمام ضروری حفاظتی اور ٹریفک مینجمنٹ اقدامات کیے گئے۔
ان اقدامات میں مناسب بیریکیڈنگ، ٹریفک کے متبادل راستوں کی نشاندہی، راستوں میں تبدیلی کے بارے میں پیشگی اطلاع، دن اور رات کی شفٹوں میں مناسب تعداد میں ٹریفک مارشلز کی تعیناتی اور رات کے وقت کام کے دوران مؤثر روشنی کا انتظام شامل تھا۔ممبئی-احمد آباد بلیٹ ٹرین کوریڈور احمد آباد ضلع میں مجموعی طور پر 31 مختلف کراسنگز سے گزرتا ہے، جن میں 8 انڈین ریلوے کراسنگز، فلائی اوورز، سڑکیں، روڈ انڈر پاسز اور 16 نہری کراسنگز شامل ہیں۔
اس کے علاوہ اس منصوبے میں دریائے سابرمتی پر ایک ریور برج کراسنگ اور چھ اسٹیل پل بھی شامل ہیں۔
سرکاری بیان کے مطابق ان 31 کراسنگز میں سے 23 پر تعمیراتی کام پہلے ہی مکمل کیا جا چکا ہے۔
