شیلانگ: میگھالیہ کے وزیر اعلیٰ کونراڈ کے سنگما نے منگل کو مرکزی حکومت سے مطالبہ کیا کہ ریاست کو قانونی طور پر کوئلے کی کان کنی کی منظوری دینے کے لیے قانونی اختیارات تفویض کیے جائیں، تاکہ ہزاروں قبائلی زمین مالکان اس شعبے میں قانونی طور پر کام کر سکیں۔

نئی دہلی میں مرکزی وزیر برائے کوئلہ و کان کنی جی کشن ریڈی سے ملاقات کے دوران سنگما نے مائنز اینڈ منرلز (ڈیولپمنٹ اینڈ ریگولیشن) ایکٹ، 1957 کی دفعہ 26 کے تحت اختیارات ریاست کو منتقل کرنے کی درخواست کی، تاکہ ریاست خود کوئلے کی کان کنی کے منصوبوں کی منظوری اور پیشگی اجازت جاری کر سکے۔

وزیر اعلیٰ نے ایک بیان میں کہا، ’’اس اقدام سے ہزاروں چھوٹے قبائلی کوئلہ مالکان کو قانونی معدنی رعایتیں اور ضروری منظوریوں کے لیے ریاست کے اندر ہی سہولت مل جائے گی۔‘‘ سنگما نے کہا کہ آئین کے چھٹے شیڈول کے تحت میگھالیہ میں زمین اور معدنیات ریاست کی نہیں بلکہ افراد، خاندانوں اور قبائل کی ملکیت ہیں، اس لیے موجودہ منظوری کا نظام ریاست کی زمینی حقیقت سے مطابقت نہیں رکھتا۔

انہوں نے کہا، ’’قومی سطح کا ماڈل میگھالیہ کی صورتحال کے مطابق نہیں ہے۔ یہاں کوئلے کے ذخائر چھوٹے اور بکھرے ہوئے ہیں اور بڑے کان کنی بلاکس کے بجائے خاندانوں اور قبائل کی چھوٹی زمینوں پر واقع ہیں۔‘‘ ان کے مطابق 2021 کے معیاری عملی طریقہ کار (ایس او پی) کے تحت کم از کم 100 ہیکٹر رعایتی رقبے کی شرط کے باعث بیشتر حقیقی قبائلی کوئلہ مالکان کان کنی کا لیز حاصل کرنے سے محروم ہیں۔ سنگما نے کہا کہ چھوٹے کان مالکان کے لیے معمولی ذخائر کی منظوری حاصل کرنے کی خاطر بار بار دہلی اور کولکاتا میں واقع انڈین بیورو آف مائنز کے دفتر جانا نہ عملی ہے اور نہ ہی مالی طور پر ممکن۔

انہوں نے کہا کہ اپریل 2014 میں نیشنل گرین ٹریبونل نے ماحولیاتی اور حفاظتی خدشات کے باعث ’’ریٹ ہول‘‘ کوئلہ کان کنی پر پابندی عائد کی تھی، جس کے بعد چھوٹے پیمانے پر کان کنی سے وابستہ ہزاروں خاندانوں کا روزگار متاثر ہوا، جبکہ ریاست کو رائلٹی، سیس اور ٹیکس کی مد میں بھی بھاری نقصان اٹھانا پڑا۔ یہ پابندی غیر سائنسی ’’ریٹ ہول‘‘ کان کنی، ماحولیاتی تباہی اور کانوں میں پیش آنے والے مہلک حادثات کے خدشات کے پیش نظر لگائی گئی تھی۔

تاہم ٹریبونل نے قانونی منظوریوں کے ساتھ سائنسی بنیادوں پر کان کنی کی اجازت دی، جبکہ غیر سائنسی طریقوں سے کان کنی اور تازہ نکالے گئے کوئلے کی نقل و حمل پر پابندی برقرار رکھی۔ جولائی 2019 میں سپریم کورٹ نے میگھالیہ کے قبائلی زمین مالکان کے کوئلہ اور دیگر معدنیات پر حقوق کو برقرار رکھا، لیکن یہ بھی واضح کیا کہ کان کنی کے تمام کام مائنز اینڈ منرلز (ڈیولپمنٹ اینڈ ریگولیشن) ایکٹ اور ماحولیاتی قوانین کے مطابق ہونے چاہئیں۔ عدالت عظمیٰ نے نیشنل گرین ٹریبونل کی پابندی سے پہلے نکالے گئے کوئلے کی منظم طریقے سے نقل و حمل اور نیلامی کی بھی اجازت دی تھی۔

یہ معاملہ وقتاً فوقتاً میگھالیہ ہائی کورٹ کی نگرانی میں بھی رہا ہے، جس نے ریاستی حکومت کو غیر قانونی کان کنی اور کوئلے کی غیر مجاز نقل و حمل روکنے، ماحولیاتی اصولوں پر سختی سے عمل درآمد کرانے اور عدالتوں کی ہدایات کے مطابق قانونی کان کنی کو فروغ دینے کے احکامات جاری کیے ہیں۔ سنگما نے مرکزی وزیر کو ایک باضابطہ یادداشت بھی پیش کی، جس میں یاد دلایا گیا کہ 2015 میں وزارتِ کوئلہ اصولی طور پر ریاست کو اختیارات منتقل کرنے پر رضامند ہو چکی تھی۔ انہوں نے مرکز سے مطالبہ کیا کہ ایم ایم ڈی آر ایکٹ کی دفعہ 26 اور متعلقہ قواعد کے تحت ضروری نوٹیفکیشن جلد جاری کیے جائیں۔