نئی دہلی: سپریم کورٹ نے پیر کو کہا کہ شادی شدہ خواتین کے ساتھ شوہروں کی جانب سے عصمت دری کو جرم قرار دینے سے متعلق درخواستوں پر سماعت کی تاریخ طے کرنے سے پہلے وہ مرکزی حکومت کا موقف جاننا چاہتی ہے۔ چیف جسٹس سوریہ کانت کی سربراہی والی تین رکنی بنچ کے سامنے سینئر وکیل اندرا جے سنگھ نے ایک ایسی درخواست کا ذکر کیا جس میں شوہر کے خلاف ازدواجی عصمت دری کے معاملے میں مقدمہ چلانے سے متعلق سوال اٹھایا گیا ہے۔

انہوں نے درخواستوں کے پورے معاملے کی سماعت نومبر میں مقرر کرنے کی اپیل کی۔ انڈرا جے سنگھ نے کہا کہ اگرچہ یہ معاملات بدھ کو سماعت کے لیے مقرر ہیں، لیکن مرکزی حکومت نے ابھی تک تفصیلی جواب داخل نہیں کیا ہے اور فریقین نے بھی ایک دوسرے کو درخواستوں کی نقول فراہم نہیں کی ہیں۔ انہوں نے کہا، ’’مرکزی حکومت نے ابتدائی اعتراض کے علاوہ کوئی جواب داخل نہیں کیا ہے۔ میں نومبر میں سماعت کے لیے ایک مقررہ تاریخ چاہتی ہوں۔ ہم نے ابھی درخواستوں کا تبادلہ بھی نہیں کیا ہے۔ ہمیں معلوم نہیں کہ ان میں کیا مماثلتیں یا اختلافات ہیں۔‘

‘ بنچ، جس میں جسٹس جوی مالیا باگچی اور جسٹس وی موہنا بھی شامل ہیں، نے کہا، ’’معاملہ بدھ کو درج ہے۔ مرکزی حکومت پیش ہوگی۔ ہم دیکھیں گے کہ وہ کیا کہتی ہے اور اس کے بعد مناسب تاریخ طے کریں گے۔‘‘ ایک اور درخواست گزار کی جانب سے پیش ہونے والی سینئر وکیل کرونا نندی نے کہا کہ معاملے کی سماعت ایسی کسی بھی تاریخ پر مقرر کی جا سکتی ہے جس سے تمام قانونی دستاویزات اور جوابات مکمل کرنے کا عمل یقینی بنایا جا سکے۔

عدالت کو بتایا گیا کہ ان درخواستوں میں فوجداری قانون کے تحت ازدواجی عصمت دری سے متعلق دفعات کی آئینی حیثیت اور تشریح کا معاملہ اٹھایا گیا ہے۔ ہندوستانی تعزیرات کوڈ (IPC) کی دفعہ 375 میں موجود استثنا کے تحت، اگر بیوی نابالغ نہ ہو تو شوہر کی جانب سے اپنی بیوی کے ساتھ جنسی تعلق یا جنسی فعل کو عصمت دری نہیں سمجھا جاتا تھا۔ IPC کو اب ختم کرکے بھارتیہ نیائے سنہتا (BNS) نافذ کی جا چکی ہے۔ نئے قانون کی دفعہ 63، جو عصمت دری سے متعلق

ہے، کی استثنائی شق 2 میں بھی کہا گیا ہے کہ اگر بیوی کی عمر 18 سال سے کم نہ ہو تو شوہر کی جانب سے اپنی بیوی کے ساتھ جنسی تعلق یا جنسی فعل عصمت دری نہیں ہے۔ سپریم کورٹ نے 16 جنوری 2023 کو ان درخواستوں پر مرکزی حکومت سے جواب طلب کیا تھا جن میں بالغ بیوی کے ساتھ زبردستی جنسی تعلق قائم کرنے پر شوہر کو قانونی کارروائی سے تحفظ دینے والی IPC کی شق کو چیلنج کیا گیا تھا۔ بعد میں عدالت نے اسی معاملے میں بھارتیہ نیائے سنہتا کی متعلقہ شق کو چیلنج کرنے والی درخواست پر بھی مرکزی حکومت کو نوٹس جاری کیا۔ نئے فوجداری قوانین—بھارتیہ نیائے سنہتا، بھارتیہ ناگرک سرکشا سنہتا (BNSS) اور بھارتیہ ساکشیہ ادھینیم—یکم جولائی 2024 سے نافذ ہوئے، جنہوں نے IPC، CrPC اور انڈین ایویڈنس ایکٹ کی جگہ لی۔

ان درخواستوں میں سے ایک کا تعلق دہلی ہائی کورٹ کے 11 مئی 2022 کے منقسم فیصلے سے ہے۔ یہ اپیل ایک خاتون نے دائر کی ہے، جو دہلی ہائی کورٹ میں دائر درخواستوں میں سے ایک کی درخواست گزار تھیں۔ دہلی ہائی کورٹ کے جسٹس راجیو شکدھر اور جسٹس سی ہری شنکر نے اپنے الگ الگ فیصلوں میں اس معاملے کو سپریم کورٹ میں لے جانے کی اجازت دی تھی، کیونکہ ان کے مطابق اس میں قانون کے اہم سوالات شامل تھے جن پر سپریم کورٹ کا فیصلہ ضروری تھا۔ جسٹس راجیو شکدھر نے ازدواجی عصمت دری کو قانونی استثنا دینے والی شق کو ’’غیر آئینی‘‘ قرار دیتے ہوئے ختم کرنے کے حق میں فیصلہ دیا تھا۔

انہوں نے کہا تھا کہ IPC کے نفاذ کے 162 سال بعد بھی اگر کسی شادی شدہ خاتون کی انصاف کی فریاد نہ سنی جائے تو یہ ’’المیہ‘‘ ہوگا۔ دوسری جانب جسٹس سی ہری شنکر نے کہا تھا کہ عصمت دری کے قانون میں یہ استثنا ’’غیر آئینی نہیں‘‘ ہے اور اس کی بنیاد ’’قابلِ فہم امتیاز‘‘ پر ہے۔ اس سے قبل کرناٹک ہائی کورٹ بھی کہہ چکا ہے کہ شوہر کو اپنی بیوی کے ساتھ عصمت دری اور غیر فطری جنسی فعل کے الزامات سے مستثنیٰ قرار دینا آئین کے آرٹیکل 14، یعنی قانون کے سامنے مساوات کے خلاف ہے۔ یہ تمام درخواستیں مفادِ عامہ کی عرضیاں ہیں، جن میں IPC کی دفعہ 375 کے تحت ازدواجی عصمت دری کے استثنا کی آئینی حیثیت کو چیلنج کیا گیا ہے۔ درخواست گزاروں کا مؤقف ہے کہ یہ شق ان شادی شدہ خواتین کے ساتھ امتیاز کرتی ہے جنہیں ان کے شوہروں کی جانب سے جنسی تشدد کا نشانہ بنایا جاتا ہے۔