سری نگر
منوج سنہا کی ’نشہ مکت جے-کے‘ مہم ہفتہ کے روز جنوبی کشمیر کے ضلع اننت ناگ پہنچی، جہاں انہوں نے سماج کے تمام طبقات سے اپیل کی کہ وہ مرکز کے زیر انتظام علاقے میں منشیات کے ناسور کے خلاف جنگ میں شامل ہوں۔سنہا نے خانہ بل علاقے کے ڈگری کالج سے نئی بستی تک ’پدیاترا‘ کی قیادت کی، جس میں سیکڑوں افراد شریک ہوئے۔ یہ پدیاترا گزشتہ ماہ شروع کی گئی 100 روزہ ’نشہ مکت جے-کے ابھیان‘ مہم کا حصہ ہے، جس کا مقصد جموں و کشمیر میں منشیات کی لت اور اسمگلنگ کے خلاف کارروائی کرنا ہے۔
لیفٹیننٹ گورنر نے عوامی اجتماع سے خطاب کرتے ہوئے کہا کہ میں لوگوں سے اپیل کرتا ہوں کہ وہ منشیات کے خلاف اس جنگ کو جیتنے کے لیے خاموشی توڑیں، اور سماج کے تمام طبقات کو منشیات کی لت کے خطرات کے بارے میں ایک آواز میں بولنا چاہیے۔انہوں نے کہا کہ منشیات کی لت کے چیلنج کو صرف ’’پورے سماج کی مشترکہ کوشش‘‘ کے ذریعے ختم کیا جا سکتا ہے۔
انہوں نے مزید کہا کہ اب سے مرکز کے زیر انتظام علاقے کے ہر کونے، چاہے وہ اسکول ہوں، کالج ہوں، خاندان ہوں، کھیل کے میدان ہوں، وارڈ ہوں، گاؤں ہوں یا تھیٹر کے اسٹیج، سب کو مضبوط عزم کے ساتھ اس مقصد کے لیے آواز بلند کرنی چاہیے۔یہ مہم 11 اپریل کو جموں میں لیفٹیننٹ گورنر کی قیادت میں ایم اے اسٹیڈیم سے نکالی گئی ایک بڑی ’پدیاترا‘ کے ساتھ شروع ہوئی تھی۔
سنہا نے 3 مئی کو سری نگر کے لال چوک علاقے میں بھی اسی طرح کی ایک ’پدیاترا‘ کی قیادت کی تھی۔
.webp "منوج سنہا نے اننت ناگ میں منشیات مخالف ’پدیاترا‘ کی قیادت کی")
