کولکتہ

آسام کے وزیر اعلیٰ ہمنتا بسوا سرما نے ہفتہ کے روز مغربی بنگال میں وزیر اعلیٰ ممتا بنرجی کی قیادت والی حکومت پر ریاست کے وسائل کو “بنگلہ دیشی مسلم دراندازوں” کے حوالے کرنے کا الزام لگاتے ہوئے کہا کہ انہیں اقتدار سے ہٹانا ضروری ہے،ورنہ ہم بنگال کو کھو دیں گے۔

بھارتیہ جنتا پارٹی کے رہنما سرما نے کالیمپونگ میں ایک ریلی سے خطاب کرتے ہوئے دعویٰ کیا کہ آسام اور تریپورہ میں ان کی جماعت کی حکومتوں نے “بنگلہ دیشی مسلمانوں” کو ہندوستان میں داخل ہونے سے روکا ہے، جبکہ بنگال میں غیر قانونی دراندازی جاری ہے۔

انہوں نے کہا کہ ممتا بنرجی نے بنگال کا سارا خزانہ بنگلہ دیشی مسلم دراندازوں کے لیے مخصوص کر دیا ہے۔ انہوں نے ووٹ کے لیے اس سرزمین کو بنگلہ دیشی مسلمانوں کو بیچ دیا ہے۔سرما نے الزام لگایا کہ وزیر اعلیٰ بننے کے بعد سے ممتا بنرجی نے پورے بنگال کو تباہ کر دیا ہے۔ انہوں نے کہا کہ ہمیں ممتا بنرجی کو بنگال کے وزیر اعلیٰ کے عہدے سے ہٹانا ہوگا، ورنہ ایک دن بنگلہ دیشی مسلمان ہم سے یہ ریاست چھین لیں گے۔بھاجپا رہنما نے دعویٰ کیا کہ ممتا بنرجی کے دور حکومت میں شمالی بنگال میں کوئی ترقی نہیں ہوئی۔ انہوں نے کہا: “جیسے ہی بنگال میں ہماری حکومت آئے گی، ہم اس علاقے سے تمام بنگلہ دیشی دراندازوں کو باہر نکال دیں گے۔

انہوں نے یہ بھی کہا کہ اگر ریاست میں ان کی جماعت اقتدار میں آئی تو گورکھالینڈ مسئلے کا آئینی حل تلاش کیا جائے گا اور “گورکھا برادری کو انصاف دلایا جائے گا۔سرما نے کوچ بہار ضلع کے دنہاتا میں ایک اور ریلی سے خطاب کرتے ہوئے بتایا کہ ترنمول کانگریس نے ان کے خلاف انتخابی کمیشن میں شکایت درج کرائی ہے۔ پارٹی نے ان پر مغربی بنگال کی وزیر اعلیٰ کے خلاف “فرقہ وارانہ رنگ والی، اشتعال انگیز اور تفرقہ پیدا کرنے والی” تقاریر کرنے کا الزام لگایا ہے۔

انہوں نے کہا کہ ترنمول کانگریس کی اس کارروائی سے وہ خوفزدہ نہیں ہوں گے۔بھاجپا رہنما نے ترنمول کانگریس کے سابق رہنما اور عام جنتا اُنیّن پارٹی کے بانی ہمایوں کبیر کی جانب سے مغربی بنگال میں بابری مسجد کے طرز پر مسجد بنانے کی کوشش کا بھی ذکر کیا اور کہا کہ اگر آسام میں ایسا کوئی اقدام ہوتا تو وہ سخت کارروائی کرتے اور اس میں ملوث شخص کو جیل بھیج دیتے۔