کولکتہ/ آواز دی وائس

بھارتیہ جنتا پارٹی (بی جے پی) نے پیر کے روز مغربی بنگال کی وزیر اعلیٰ ممتا بنرجی پر شدید تنقید کی، جب ریاستی اسپتال ایس ایس کے ایم میں 15 سالہ لڑکی کے ساتھ مبینہ طور پر چھیڑ چھاڑ کا واقعہ پیش آیا۔ بی جے پی نے کہا کہ ممتا حکومت نے آر جی کر میڈیکل کالج میں پیش آئے ریپ اور قتل کے واقعے سے کوئی سبق نہیں سیکھا، حالانکہ اسے ایک سال سے زیادہ عرصہ گزر چکا ہے۔

بی جے پی کی ترجمان کیا گھوش نے  کہا کہ ممتا بنرجی ایک ناکام وزیر اعلیٰ ہیں۔ انہیں خواتین کی حفاظت کی کوئی فکر نہیں۔ ان کے نام میں اگرچہ 'ممتا' ہے، مگر ان کے عمل میں ذرا بھی ممتا نہیں۔ درگاپور واقعے کے بعد انہوں نے کہا تھا کہ یہ ایک نجی اسپتال کا معاملہ ہے، لیکن اب یہ واقعہ ایک سرکاری اسپتال میں پیش آیا ہے، جو ان کے گھر کے بہت قریب ہے — اتنا قریب کہ اگر کوئی چیخے تو آواز ان کے گھر تک پہنچ سکتی ہے — اور یہ اسپتال ان کے ہی حلقے میں آتا ہے۔ انہوں نے مزید کہا کہ مغربی بنگال میں ایک خاتون وزیر اعلیٰ ہونے کے باوجود خواتین خود کو غیر محفوظ محسوس کرتی ہیں۔

کیا گھوش نے کہا کہ ممتا بنرجی کے حلقے میں، ایک عالمی معیار کے سپر اسپیشلٹی اسپتال میں، سب کے سامنے دن کے اجالے میں، ایک اجنبی شخص جو ڈاکٹر کا کوٹ پہنے ہوئے تھا، نابالغ لڑکی کو مردوں کے واش روم میں کیسے لے جا سکتا ہے؟ آر جی کر کا واقعہ صرف ایک سال پہلے پیش آیا تھا، مگر ممتا حکومت نے اس سے کوئی سبق نہیں سیکھا۔

انہوں نے مزید کہا کہ خواتین کے لیے کوئی سکیورٹی نہیں ہے۔ اگرچہ وزیر اعلیٰ ایک خاتون ہیں، لیکن مغربی بنگال کی خواتین خود کو بالکل غیر محفوظ محسوس کرتی ہیں۔ ممتا بنرجی کو فوری طور پر استعفیٰ دینا چاہیے۔ بنگال کے عوام اب فیصلہ کر چکے ہیں کہ وہ انہیں مزید وزیر اعلیٰ کے طور پر نہیں چاہتے۔ پولیس کے مطابق، متاثرہ لڑکی بدھ کی دوپہر ایس ایس کے ایم اسپتال کے آؤٹ پیشنٹ ڈیپارٹمنٹ (او پی ڈی) میں چیک اپ کے لیے آئی تھی، جب یہ مبینہ واقعہ پیش آیا۔

ملزم، جو خود کو این آر ایس اسپتال کا وارڈ بوائے بتا رہا تھا، نے لڑکی کو بہلا پھسلا کر اسپتال کے واش روم میں لے جا کر مبینہ طور پر ہراساں کیا۔ بھوانی پور پولیس نے متاثرہ لڑکی کے دستخط شدہ بیان کی بنیاد پر پوکسو ایکٹ 2012 کے تحت ایف آئی آر درج کی۔ پولیس کے مطابق، ملزم کی شناخت سمبھوناتھ پانڈت اسپتال کے سابق گروپ-ڈی ملازم امت ملک کے طور پر ہوئی ہے۔ 

چھاپہ پرگتی میدان پولیس اسٹیشن کے دائرۂ اختیار میں مارا گیا، جہاں سے 34 سالہ امت ملک، جو ڈھاپا روڈ بستی، ملک پارہ، کولکتہ کا رہائشی ہے، کو 22 اکتوبر کو گرفتار کیا گیا۔ پولیس کے مطابق، یہ واقعہ ٹراؤما کیئر سینٹر  کی عمارت کے گراؤنڈ فلور کے واش روم میں پیش آیا، جو او پی ڈی بلڈنگ سے تقریباً 200 میٹر کے فاصلے پر واقع ہے۔