کولکاتا (مغربی بنگال): مغربی بنگال کی سابق وزیر اعلیٰ اور ترنمول کانگریس (ٹی ایم سی) کی سربراہ ممتا بنرجی جمعرات کے روز کلکتہ ہائی کورٹ پہنچیں اور وکیل کی وردی پہن کر چیف جسٹس ایچ سی سُجئے پال کے سامنے پیش ہوئیں۔ یہ پیشی 2026 کے اسمبلی انتخابات کے نتائج کے بعد مبینہ پوسٹ پول تشدد سے متعلق ایک پبلک انٹرسٹ لٹیگیشن (PIL) کے سلسلے میں تھی۔

بتایا گیا ہے کہ بنرجی اس کیس کی کارروائی کے مختلف پہلوؤں پر سوالات اٹھائیں گی، جس میں انتخابات کے نتائج کے بعد مبینہ تشدد کے واقعات شامل ہیں۔ یہ درخواست ایڈووکیٹ سریسنیہ بنرجی نے دائر کی تھی، جو ٹی ایم سی رہنما و وکیل کلیان بندوپادھیائے کے بیٹے اور اتپارہ اسمبلی حلقے سے پارٹی امیدوار بھی ہیں۔

درخواست گزار نے الزام لگایا کہ ریاست کے مختلف علاقوں میں انتخابی نتائج کے بعد تشدد کے واقعات پیش آئے، جن میں پارٹی دفاتر پر حملے اور کارکنوں کی بے دخلی شامل ہے۔ ممتا بنرجی نے عدالت میں پارٹی کا مؤقف پیش کیا۔ سینئر وکیل کلیان بندوپادھیائے بھی عدالت میں موجود تھے۔

ممتا بنرجی نے فوری تحفظ کی درخواست کرتے ہوئے کہا: “پولیس کے سامنے ہی غنڈہ گردی، آتش زنی اور...” انہوں نے مزید کہا: “بچوں کو نہیں چھوڑا گیا، اقلیتوں کو نہیں بخشا گیا، خواتین کو بھی نہیں بخشا گیا، ہمارے 10 کارکنوں کو قتل کیا گیا ہے۔” کلیان بندوپادھیائے نے عدالت کو بتایا کہ “ٹی ایم سی کے کئی پارٹی دفاتر کو جلا دیا گیا ہے۔”

انہوں نے کہا کہ 2021 کے پوسٹ پول تشدد کیس کی طرح اس معاملے میں بھی ایک اعلیٰ عدالتی بینچ تشکیل دیا جائے، کیونکہ “آج کے واقعات اس وقت سے بھی زیادہ سنگین ہیں۔” ٹی ایم سی نے کلکتہ ہائی کورٹ سے درخواست کی ہے کہ مبینہ تشدد کے واقعات پر عدالتی مداخلت کی جائے۔ اس میں پارٹی کارکنوں کے تحفظ اور مکمل تحقیقات کا مطالبہ کیا گیا ہے۔

رپورٹس کے مطابق کولکاتا، ہاوڑہ اور مختلف اضلاع میں جھڑپوں اور توڑ پھوڑ کے واقعات سامنے آئے ہیں، جن پر بی جے پی اور ٹی ایم سی ایک دوسرے پر الزامات لگا رہے ہیں۔ ٹی ایم سی رہنما کنال گھوش نے کہا: “ممتا بنرجی عوام اور کارکنوں کے ساتھ کھڑی رہنے والی رہنما ہیں۔ آج وہ وکیل کے کردار میں عوام کے لیے لڑ رہی ہیں۔

” دوسری جانب بی جے پی ایم ایل اے ساجل گھوش نے کہا: “وہ جا سکتی ہیں، یہ ان کا حق ہے... اب ان کے پاس کرنے کو کیا کام ہے؟” واضح رہے کہ 2026 کے مغربی بنگال اسمبلی انتخابات میں بی جے پی نے 207 نشستیں جیت کر تاریخ رقم کی، جبکہ 15 سال سے برسراقتدار ترنمول کانگریس کو صرف 80 نشستیں حاصل ہو سکیں۔