نئی دہلی

وزیرِ اعظم نریندر مودی نے بدھ کے روز دہلی کے مالویہ نگر میں پیش آنے والے ہولناک آتشزدگی کے واقعے میں جاں بحق ہونے والے 21 افراد کے اہلِ خانہ کے لیے دو لاکھ روپے اور زخمیوں کے لیے 50 ہزار روپے امدادی رقم (ایکس گریشیا) کا اعلان کیا۔ انہوں نے متاثرہ خاندانوں سے گہرے رنج و غم کا اظہار بھی کیا۔

ایکس پر جاری ایک بیان میں وزیرِ اعظم کے دفتر (پی ایم او) نے کہا کہ وزیرِ اعظم قومی ریلیف فنڈ (پی ایم این آر ایف) سے ہر جاں بحق فرد کے قریبی لواحقین کو دو لاکھ روپے جبکہ ہر زخمی کو 50 ہزار روپے دیے جائیں گے۔

بیان میں کہا گیا کہ دہلی کے مالویہ نگر میں آتشزدگی کے باعث قیمتی جانوں کا ضیاع انتہائی افسوسناک ہے۔ جن خاندانوں نے اپنے عزیزوں کو کھویا ہے، ان سے میری دلی ہمدردیاں ہیں۔ زخمیوں کی جلد صحت یابی کے لیے دعا گو ہوں۔ متاثرین کو ہر ممکن مدد فراہم کی جا رہی ہے۔ ہر متوفی کے اہلِ خانہ کو پی ایم این آر ایف سے دو لاکھ روپے اور زخمیوں کو 50 ہزار روپے امدادی رقم دی جائے گی۔

دہلی پولیس کے مطابق مالویہ نگر میں واقع فلورش اسٹے بی اینڈ بی میں آگ لگنے کی اطلاع صبح 8:48 بجے موصول ہوئی، جس کے بعد پولیس اہلکار فوری طور پر موقع پر پہنچے اور ریسکیو، انخلا اور امدادی کارروائیاں شروع کر دیں۔

فائر بریگیڈ کی آٹھ گاڑیوں کی مدد سے آگ پر قابو پا لیا گیا۔ دہلی پولیس، فائر سروس اور دیگر ہنگامی اداروں کی مشترکہ کوششوں سے 40 سے زائد افراد کو بچا کر قریبی اسپتالوں میں منتقل کیا گیا، تاہم 21 افراد جانبر نہ ہو سکے۔سرکاری بیان میں کہا گیا کہ آج صبح 8:48 بجے فلورش اسٹے بی اینڈ بی، مالویہ نگر میں آگ لگنے کی اطلاع ملی۔ مقامی پولیس فوراً موقع پر پہنچی اور امدادی کارروائیاں شروع کیں۔ آٹھ فائر ٹینڈرز کی مدد سے آگ پر قابو پا لیا گیا۔ پولیس، فائر سروسز اور دیگر ہنگامی اداروں کی مشترکہ کوششوں سے 40 سے زائد افراد کو بچایا گیا اور علاج کے لیے اسپتال منتقل کیا گیا، لیکن افسوس کے ساتھ 21 افراد کو مردہ قرار دیا گیا۔

بیان میں مزید کہا گیا کہ ریسکیو اور تلاشی کا عمل ابھی جاری ہے اور تمام متعلقہ ادارے متاثرین کو ہر ممکن مدد فراہم کرنے کے لیے موقع پر موجود ہیں۔فائر آفیسر اے کے ملک نے بتایا کہ محکمہ کو صبح تقریباً 8:50 بجے ہنگامی کال موصول ہوئی تھی، جس کے بعد ابتدائی طور پر سات فائر ٹینڈرز روانہ کیے گئے اور ضرورت کے مطابق مزید گاڑیاں بھیجی گئیں۔

انہوں نے اے این آئی سے گفتگو کرتے ہوئے کہا کہ جیسے ہی ہماری ٹیم موقع پر پہنچی، عمارت سے 37 افراد کو بحفاظت نکال لیا گیا۔ عمارت میں ایک تہہ خانہ، گراؤنڈ فلور اور پانچ بالائی منزلیں تھیں۔ ابتدائی تحقیقات سے معلوم ہوا کہ یہ عمارت صرف رہائشی کمپلیکس کے طور پر استعمال نہیں ہو رہی تھی۔ زیادہ تر افراد سامنے واقع میکس اسپتال میں زیرِ علاج مریضوں کے تیماردار یا رشتہ دار تھے۔

اے کے ملک نے مزید بتایا کہ عمارت میں کچھ غیر ملکی شہری بھی مقیم تھے۔ انہوں نے کہا کہ آگ پر بہت تیزی سے قابو پا لیا گیا۔ اب عمارت کو مکمل طور پر خالی کرا کے مزید تحقیقات کے لیے پولیس کے حوالے کر دیا گیا ہے۔