سکما (چھتیس گڑھ): چھتیس گڑھ کے ضلع سکما میں مکھیا منتری سوستھ بستر ابھیان کے تحت جاری مہم کے نتیجے میں شدید غذائی قلت اور خون کی کمی میں مبتلا چھ ماہ کے بچے گنیش کو نئی زندگی مل گئی ہے۔ گاؤں گمڈی میں مکھیا منتری سوستھ بستر ابھیان کے تحت منعقدہ صحت کیمپ کے دوران جانچ میں چار بچوں کی حالت تشویش ناک پائی گئی۔

ان میں چھ ماہ کے گنیش میں شدید غذائی قلت اور خون کی شدید کمی (اینیمیا) کی تشخیص ہوئی۔ اس وقت اس کا وزن تقریباً دو کلوگرام اور ہیموگلوبن کی مقدار 4.7 تھی، جس کے بعد اسے فوری طور پر نیوٹریشن ری ہیبلیٹیشن سینٹر (این آر سی) بھیجا گیا، جہاں علاج اور غذائی نگہداشت سے اس کی حالت میں نمایاں بہتری آئی۔ کمیونٹی ہیلتھ آفیسر سندھیا ناگ نے بتایا کہ گنیش کی کہانی امید اور تبدیلی کی ایک مثال بن گئی ہے۔

محکمہ صحت کی ٹیم جب مہم کے تحت گمڈی اور آس پاس کے دیہات پہنچی تو طبی معائنے کے دوران گنیش سمیت چار بچے غذائی قلت کا شکار پائے گئے۔ انہوں نے کہا کہ معائنے کے فوراً بعد تمام بچوں کو ضلع اسپتال کے این آر سی بھیج دیا گیا۔ گنیش کی نازک حالت کے پیش نظر اسے خصوصی نگرانی میں رکھا گیا اور علاج شروع کیا گیا، جس کے مثبت نتائج جلد سامنے آنے لگے۔

گنیش کی صحت یابی سے متاثر ہو کر اب دیہاتی خود کمزور اور غذائی قلت کے شکار بچوں کی اطلاع محکمہ صحت کی ٹیم کو دینے لگے ہیں۔ والدین کو بھی ترغیب دی جا رہی ہے کہ وہ اپنے بچوں کا بروقت طبی معائنہ کرائیں اور ضرورت پڑنے پر اسپتال لے جائیں۔ سکما کے کلکٹر امت کمار نے کہا کہ مکھیا منتری سوستھ بستر ابھیان کے تحت دیگر صحت کے مسائل کے ساتھ غذائی قلت کا خاتمہ بھی اولین ترجیح ہے۔

محکمہ خواتین و اطفال کی ترقی کے تعاون سے غذائی قلت کے شکار بچوں کی مسلسل نگرانی کی جا رہی ہے۔ انہوں نے بتایا کہ محکمہ صحت کی ٹیمیں مسلسل دیہات کا دورہ کر رہی ہیں اور آنگن واڑی مراکز میں بچوں کی اسکریننگ کی جا رہی ہے۔ جیسے ہی کسی بچے میں غذائی قلت یا صحت کا کوئی اور مسئلہ سامنے آتا ہے، فوری طور پر علاج کا منصوبہ بنایا جاتا ہے۔ کلکٹر کے مطابق ضرورت مند بچوں کو سکما، کونٹا اور چھند گڑھ میں قائم این آر سی مراکز بھیجا جا رہا ہے، جہاں علاج اور متوازن غذا کے ذریعے ان کی صحت بہتر بنائی جا رہی ہے۔ گنیش کی کہانی اسی کوشش کی ایک کامیاب مثال ہے۔ ضلع انتظامیہ اب صحت، غذائیت اور تعلیم کو ایک ساتھ جوڑنے پر بھی کام کر رہی ہے۔

اس مقصد کے تحت آنگن واڑی مراکز کو بال واڑی (پری اسکول) کے تصور سے مربوط کیا جا رہا ہے تاکہ ابتدائی جماعتوں کے اساتذہ بھی بچوں کے ساتھ وقت گزاریں اور ان کی ہمہ جہت نشوونما کو یقینی بنایا جا سکے۔ چیف میڈیکل اینڈ ہیلتھ آفیسر ڈاکٹر آر کے سنگھ نے بتایا کہ ضلع میں سکما، کونٹا اور چھند گڑھ میں تین این آر سی مراکز فعال ہیں، جہاں شدید غذائی قلت کے شکار بچوں کو تقریباً پندرہ دن تک داخل رکھ کر غذائی بحالی کا علاج فراہم کیا جاتا ہے۔

انہوں نے کہا کہ این آر سی میں بچوں کو غذائی چارٹ کے مطابق متوازن غذا، صاف ستھرا ماحول اور باقاعدہ طبی معائنہ فراہم کیا جاتا ہے۔ گنیش کا علاج بھی اسی طریقے سے کیا گیا۔ شدید خون کی کمی کے باعث اسے خون بھی چڑھایا گیا، جس کے بعد اس کی صحت تیزی سے بہتر ہونے لگی۔ ڈاکٹر سنگھ نے کہا کہ مکھیا منتری سوستھ بستر ابھیان کے تحت مسلسل کوششوں کے نتیجے میں ضلع میں غذائی قلت، زچہ و بچہ کی اموات کی شرح میں کمی دیکھی جا رہی ہے، جبکہ دور دراز علاقوں تک بھی صحت کی سہولیات پہنچائی جا رہی ہیں تاکہ کوئی بھی بچہ علاج سے محروم نہ رہے۔

کمیونٹی ہیلتھ آفیسر انجلی باگھیل نے بتایا کہ غذائی قلت سے نمٹنے کے لیے ہر منگل اور جمعہ کو آنگن واڑی مراکز میں ولیج ہیلتھ، سینیٹیشن اینڈ نیوٹریشن ڈے منایا جاتا ہے، جہاں بچوں کا قد اور وزن باقاعدگی سے ناپا جاتا ہے اور نتائج کی بنیاد پر ان کی صحت کا جائزہ لے کر علاج کا فیصلہ کیا جاتا ہے۔

ہیلتھ ورکر گریما نیتم کے مطابق جیسے ہی کسی بچے میں غذائی قلت کی علامات ظاہر ہوتی ہیں، آنگن واڑی کارکن، میتانن اور محکمہ صحت کی ٹیم مل کر اسے علاج اور غذائی بحالی کے لیے این آر سی بھیج دیتی ہے۔ گنیش کے معاملے میں بھی یہی طریقہ اختیار کیا گیا۔ گنیش کے دادا سیتارام نے کہا کہ پہلے گنیش بہت کمزور اور دبلا پتلا تھا۔ صحت کیمپ کے دوران اس کی بیماری کا پتہ چلا اور علاج کے بعد اب وہ صحت مند ہو گیا ہے، جس پر پورا خاندان بہت خوش ہے۔