چنڈی گڑھ

ریاستی خصوصی آپریشن سیل  ایس اے ایس نگر (موہالی) نے سرحد پار دہشت گرد نیٹ ورک کے خلاف ایک بڑی کامیابی حاصل کرتے ہوئے بیرونِ ملک موجود ایک دہشت گرد کے دو ساتھیوں کو گرفتار کر لیا ہے۔ حکام کے مطابق ان کے قبضے سے مکمل طور پر تیار آر ڈی ایکس پر مبنی امپرووائزڈ ایکسپلوسیو ڈیوائس  برآمد کر کے ایک دہشت گرد منصوبے کو ناکام بنا دیا گیا۔ یہ بات حکام نے جمعرات کو بتائی۔

گرفتار ہونے والوں میں امرتسر کے گجرپورہ کے رہائشی مانی سنگھ (32) اور امرتسر کے گل والی گیٹ کے رہائشی ابھیشیک کمار (28) شامل ہیں۔ پولیس کے ڈائریکٹر جنرل گورو یادو نے بتایا کہ برآمد کیا گیا تقریباً 2.5 کلوگرام  آئی ای ڈی مکمل طور پر استعمال کے لیے تیار تھا۔انہوں نے سوشل میڈیا پلیٹ فارم 'ایکس' پر ایک پوسٹ میں کہا کہ اس کارروائی نے SAS نگر میں اہم عوامی بنیادی ڈھانچے کو نشانہ بنانے کی ایک خطرناک سازش کو ناکام بنا دیا اور عوامی سلامتی کو درپیش خطرے کو ٹال دیا۔

ڈی جی پی نے کہا کہ اس سازش میں شامل تمام افراد، بشمول دہشت گردوں، معاونین اور دیگر روابط کو بے نقاب کرنے کے لیے تفتیش جاری ہے۔کارروائی کی تفصیل بتاتے ہوئے انسپکٹر جنرل آف پولیس  کاؤنٹر انٹیلیجنس آشش چودھری نے کہا کہ خفیہ معلومات کی بنیاد پر پولیس ٹیم نے دونوں مشتبہ افراد کو موہالی کے وائی پی ایس چوک کے سامنے ایک پارک کے قریب سے گرفتار کیا۔

انہوں نے بتایا کہ یہ دونوں مشتبہ افراد بم کے ساتھ بس کے ذریعے امرتسر سے موہالی آئے تھے۔

حکام نے فوری طور پر بم ڈسپوزل اسکواڈ کو طلب کیا، جس نے تمام حفاظتی پروٹوکول پر عمل کرتے ہوئے آئی ای ڈی کو کامیابی سے ناکارہ بنا کر تباہ کر دیا۔  آئی جی پی نے بتایا کہ ابتدائی تحقیقات سے معلوم ہوا ہے کہ ملزم مانی سنگھ نے حال ہی میں ایک سوشل میڈیا پلیٹ فارم کے ذریعے بیرونِ ملک موجود ایک دہشت گرد سے رابطہ کیا اور اپنے بہنوئی ابھیشیک کمار کو بھی اس سے ملایا۔

پولیس افسر کے مطابق گفتگو کے دوران بیرونِ ملک موجود دہشت گرد نے کچھ کام مکمل کرنے کے بدلے مالی مدد کی پیشکش کی، اور دونوں مالی مشکلات کی وجہ سے اس کے لیے کام کرنے پر راضی ہو گئے۔