نئی دہلی/ آواز دی وائس

دفاعی حصولی کونسل (ڈی اے سی) کی ایک اہم میٹنگ میں ہندوستان کی عسکری طاقت کو مزید مضبوط بنانے سے متعلق بڑے فیصلے کیے گئے ہیں۔ اس میٹنگ کی صدارت وزیرِ دفاع راج ناتھ سنگھ نے کی۔ دستیاب معلومات کے مطابق ڈی اے سی نے تقریباً 79 ہزار کروڑ روپے کے دفاعی خریداری اور اپ گریڈ سے متعلق تجاویز کو منظوری دے دی ہے، جس سے تینوں افواج—بری فوج، بحریہ اور فضائیہ کی آپریشنل صلاحیت میں نمایاں اضافہ ہوگا۔

اتوار (29 دسمبر 2025) کو ہونے والی میٹنگ میں ہندوستانی بری فوج کے لیے آرٹلری رجمنٹ کی غرض سے لوئٹر منیشن سسٹم، لو لیول لائٹ ویٹ ریڈار، پیناکا ملٹی پل لانچ راکٹ سسٹم (ایم آر ایل ایس) کے لیے لانگ رینج گائیڈڈ راکٹ گولہ بارود اور انٹیگریٹڈ ڈرون ڈیٹیکشن اینڈ انٹرڈکشن سسٹم ایم کے-2 کی خریداری کے لیے اے او این  کو منظوری دی گئی۔

میزائل سسٹم اور جدید ہتھیاروں کی خریداری پر مہر

ڈی اے سی کی میٹنگ میں خاص طور پر میزائل سسٹمز اور جدید ہتھیاروں کی خریداری پر منظوری دی گئی ہے۔ ہندوستانی بحریہ اور ہندوستانی فضائیہ کے لیے ایم آر-سام (میڈیم رینج سرفیس ٹو ایئر میزائل) کی خرید کو منظوری ملی ہے۔ یہ میزائل دشمن کے طیاروں، میزائلوں اور ڈرونز کو مار گرانے کی صلاحیت رکھتے ہیں اور بحری و فضائی سلامتی کو مزید مضبوط کریں گے۔

ڈرون اور لوئٹر منیشن کو فروغ

ڈی اے سی نے لوئٹر منیشن کی خریداری کو بھی ہری جھنڈی دکھا دی ہے۔ یہ فیصلہ اس بات کی عکاسی کرتا ہے کہ ہندوستانی افواج جدید اور انتہائی درست جنگی ٹیکنالوجیز کی جانب تیزی سے پیش قدمی کر رہی ہیں۔

ٹینک اور ہیلی کاپٹر ہوں گے اپ گریڈ

اس کے ساتھ ہی بری فوج کے ٹی-90 ٹینکوں کے اوورہال کو منظوری دی گئی ہے، جس سے ان کی جنگی صلاحیت مزید قابلِ اعتماد ہو جائے گی۔ وہیں فضائیہ کے ایم آئی-17 ہیلی کاپٹروں کے مڈ لائف اپ گریڈ کو بھی منظوری دی گئی ہے تاکہ ان کی آپریشنل تیاری میں بہتری آئے۔

فضائیہ کی طاقت میں اضافہ

ڈی اے سی نے ایئر ٹو ایئر ری فیولر اور اے واکس (ایئر بورن ارلی وارننگ سسٹم) سے متعلق آر ایف پی میں تبدیلیوں کو بھی منظوری دی ہے، جس سے فضائیہ کی طویل فاصلے تک آپریشن کرنے کی صلاحیت مزید مضبوط ہوگی۔ اس کے علاوہ ہندوستانی فضائیہ کے لیے آسترا مارک-2 ایئر ٹو ایئر میزائلوں کی خرید پر بھی اتفاق کیا گیا ہے، جن کی رینج تقریباً 200 کلومیٹر ہے۔ اس سے دشمن کے طیاروں کو ملک کی سرحد کے اندر ہی نشانہ بنایا جا سکے گا۔ آپریشن سندور کے بعد طویل فاصلے کے میزائلوں کی ضرورت مزید واضح ہو گئی ہے۔ فضائیہ کے پاس پہلے ہی آسترا مارک-1 موجود ہے، جبکہ ڈی آر ڈی او آسترا مارک-3 پر بھی کام کر رہا ہے۔

ڈی اے سی کے یہ فیصلے ہندوستان کی عسکری تیاری، جدید کاری اور خود کفیل دفاعی صلاحیت کو نئی مضبوطی فراہم کریں گے۔ خاص طور پر میزائل، ڈرون اور اپ گریڈ منصوبوں سے تینوں افواج کی جارحانہ اور دفاعی طاقت میں نمایاں اضافہ متوقع ہے، جس سے ملک کی مجموعی سلامتی مزید مستحکم ہوگی۔