امپھال

منی پور میں شدت پسندوں کے خلاف سکیورٹی فورسز نے بڑی کارروائی انجام دی ہے۔ منی پور کے ضلع تنگناؤپال میں سکیورٹی فورسز نے ہندوستان-میانمار سرحد کے قریب سے ممنوعہ تنظیم پی آر ای پی اے کے (آر اے) کے 10 ارکان کو گرفتار کر لیا ہے۔ پولیس نے منگل کو جاری بیان میں یہ معلومات دی ہیں۔ پولیس کے مطابق گرفتار افراد میں پانچ نابالغ بھی شامل ہیں۔

پولیس کے بیان میں کہا گیا ہے کہ ان افراد کو مورے تھانہ علاقے میں سرحدی ستون نمبر 77 اور 82 کے درمیان واقع علاقے سے گرفتار کیا گیا۔ بیان کے مطابق پانچوں نابالغوں کے خلاف جیوینائل جسٹس ایکٹ کے تحت مناسب کارروائی کی جا رہی ہے۔

منی پور میں تلاشی مہم جاری

دو سال قبل نسلی تشدد بھڑکنے کے بعد سے سکیورٹی فورسز مسلسل منی پور میں تلاشی مہم چلا رہی ہیں، اور اب تک کئی شدت پسندوں کو گرفتار کیا جا چکا ہے۔واضح رہے کہ مئی 2023 میں منی پور میں میتیئی اور کوکی برادریوں کے درمیان تشدد شروع ہوا تھا۔ اس نسلی تصادم میں 260 سے زیادہ افراد ہلاک ہو چکے ہیں جبکہ ہزاروں لوگ بے گھر ہو گئے ہیں۔ دونوں برادریوں کے درمیان عدم اعتماد بھی عروج پر پہنچ چکا ہے، اور اس تشدد کو روکنے کے لیے حکومت کو کافی جدوجہد کرنی پڑ رہی ہے۔

اُکھرول ضلع میں فائرنگ، خاتون زخمی

ادھر منی پور میں فائرنگ کے واقعات رکنے کا نام نہیں لے رہے۔ اُکھرول ضلع میں پیر کے روز مشتبہ حملہ آوروں کی فائرنگ میں ایک خاتون زخمی ہو گئی۔ حکام کے مطابق تانگکھل ناگا اکثریتی ضلع کے کوکی بستی مونگکوٹ چیپو گاؤں میں ہونے والی فائرنگ میں خاتون کے پیر میں گولی لگی۔

ابتدائی طبی امداد کے بعد خاتون کو مزید علاج کے لیے کانگپوکپی ضلع منتقل کیا گیا، جہاں ان کی حالت خطرے سے باہر بتائی جا رہی ہے۔

اُکھرول میں قائم کوکی سی ایس او ورکنگ کمیٹی نامی کمیونٹی گروپ کے مطابق یہ واقعہ دوپہر تقریباً ایک بجے پیش آیا، جب خواتین سمیت گاؤں کے لوگ مرکزی بستی سے کچھ فاصلے پر کھیتوں میں روزمرہ زرعی کاموں میں مصروف تھے۔