ممبئی 

مہاراشٹر اسمبلی کے مانسون اجلاس کے پہلے دن پیر کو اپوزیشن اراکینِ اسمبلی نے کسانوں کے قرض معافی کے مسئلے پر احتجاجی مظاہرہ کیا۔شیو سینا (یو بی ٹی) کے رکن اسمبلی آدتیہ ٹھاکرے، کانگریس رہنما وجے وڈیٹیوار اور دیگر اپوزیشن رہنماؤں نے وزیر اعلیٰ دیویندر فڑنویس کی قیادت والی ریاستی حکومت کے خلاف مراٹھی زبان میں نعرے لگائے۔ مظاہرین نے مطالبہ کیا کہ کسانوں کے 7/12 زمینی ریکارڈ کو صاف کیا جائے۔

۔2 جون کو مہاراشٹر کابینہ نے "پُنیہ شلوک اہلیہ دیوی ہولکر کسان قرض راحت یوجنا" کی منظوری دی تھی، جس کے تحت ریاست کے کسانوں کا 2 لاکھ روپے تک کا قرض معاف کیا جائے گا۔اس اسکیم کے تحت زمین کی ملکیت سے متعلق کوئی شرط عائد نہیں کی گئی ہے اور 2 لاکھ روپے تک کے قرض رکھنے والے کسان قرض معافی کے اہل ہوں گے۔19 جون کو ریاستی حکومت نے اس اسکیم کے نفاذ کی نگرانی کے لیے تین کمیٹیاں تشکیل دیں، جن میں وزیر اعلیٰ دیویندر فڑنویس کی سربراہی میں ایک کابینہ ذیلی کمیٹی بھی شامل ہے۔

یہ اقدام اس تنقید کے بعد اٹھایا گیا جس میں کہا گیا تھا کہ پُنیہ شلوک اہلیہ دیوی ہولکر زرعی قرض معافی اسکیم سے بڑی تعداد میں کسان باہر رہ گئے ہیں۔دریں اثنا، مانسون اجلاس کے پہلے روز اپوزیشن اراکین نے چھترپتی شیواجی مہاراج کو بھی خراجِ عقیدت پیش کیا اور ان کے مجسمے پر پھول نچھاور کیے۔

مہاراشٹر کے وزیر اعلیٰ دیویندر فڑنویس نے اپنے نائب وزرائے اعلیٰ ایکناتھ شندے اور سنیترا پوار سمیت دیگر رہنماؤں کے ساتھ چھترپتی شیواجی مہاراج کو خراجِ عقیدت پیش کیا۔اس سے قبل اتوار کے روز مانسون اجلاس کے آغاز سے پہلے وزیر اعلیٰ دیویندر فڑنویس نے اپوزیشن کو تنقید کا نشانہ بناتے ہوئے الزام لگایا تھا کہ اپوزیشن بار بار ایسے معاملات اٹھا رہی ہے جن پر حکومت پہلے ہی بات چیت کر چکی ہے اور ان کا حل بھی نکال چکی ہے۔

انہوں نے ریاست کے زرعی قرض معافی پروگرام سے متعلق خدشات پر بھی اظہارِ خیال کرتے ہوئے کہا کہ قرض معافی کوئی سیاسی ہتھیار نہیں بلکہ اس کا مقصد کسانوں کو دوبارہ ادارہ جاتی قرضوں تک رسائی فراہم کرنا ہے۔

فڑنویس کے مطابق تقریباً 56 لاکھ کسان اس قرض معافی پیکیج سے فائدہ اٹھائیں گے، جس کی مجموعی مالیت 36 ہزار 585 کروڑ روپے ہے۔ انہوں نے کہا کہ یہ مہاراشٹر کی تاریخ میں اس نوعیت کا سب سے بڑا اقدام ہے۔