ممبئی: وزیر اعلیٰ دیویندر فڑنویس کی قیادت والی مہاراشٹر حکومت نے کھلے خوردنی تیل کی فروخت پر ایک سال کی عارضی چھوٹ دے دی ہے۔ اس فیصلے سے ریاست بھر کے روایتی تاجروں اور چھوٹے دکانداروں کو بڑی راحت ملے گی۔ یہ فیصلہ وزیر اعلیٰ دیویندر فڑنویس اور تیل کے تاجروں کے ایک وفد کے درمیان ملاقات کے بعد کیا گیا۔ وزیر اعلیٰ نے کہا کہ اگرچہ کھلے تیل کی فروخت کو منظم کرنے کے لیے معیاری قوانین 2011 میں نافذ کیے گئے تھے، لیکن کم آمدنی والے اور پسماندہ طبقات کی فوری ضروریات کو بھی مدنظر رکھنا ضروری ہے۔
فڑنویس نے کہا، ’’آج بھی بڑی تعداد میں کم آمدنی والے صارفین کھلا خوردنی تیل خریدنے پر انحصار کرتے ہیں۔ اس لیے قانون پر عمل درآمد یقینی بنانے کے ساتھ عام شہریوں اور روایتی دکانداروں کو درپیش عملی مشکلات کو دور کرنا بھی اتنا ہی ضروری ہے۔‘‘ اس منتقلی کے عمل کو آسان بنانے کے لیے ریاستی حکومت فوڈ اینڈ ڈرگس ایڈمنسٹریشن (ایف ڈی اے) اور تیل کے تاجروں کے نمائندوں پر مشتمل ایک مشترکہ کمیٹی تشکیل دے گی۔ یہ کمیٹی روایتی تاجروں کو غذائی تحفظ کے معیار پر عمل کرنے کے لیے درکار عملی تبدیلیوں کا تعین کرے گی۔
حکومت نے تاجروں کو ان تبدیلیوں کے مطابق ڈھلنے میں مدد فراہم کرنے کی بھی یقین دہانی کرائی ہے۔ وزیر اعلیٰ نے واضح کیا کہ یہ رعایت عارضی ہے اور ایک سال کی مدت میں مزید توسیع کسی بھی صورت نہیں کی جائے گی۔ تاجروں کو ہدایت دی گئی ہے کہ وہ اس مدت کے اندر اپنے کاروباری طریقۂ کار کو قانونی ضوابط کے مطابق بنائیں، جس کے بعد قانون پر مکمل عمل درآمد سختی سے یقینی بنایا جائے گا۔ دریں اثنا، 28 اگست کو مہاراشٹر فوڈ اینڈ ڈرگس ایڈمنسٹریشن نے پونے کے وڈکی میں واقع ایک معروف دوا ساز کمپنی کے کیرِی اینڈ فارورڈنگ (سی اینڈ ایف) ادویات کی فروخت کے لائسنس منسوخ کر دیے تھے۔
یہ کارروائی 27 اگست سے مؤثر ہوئی اور متعدد ضابطوں کی خلاف ورزیوں کے پیش نظر کی گئی۔ یہ کارروائی رواں سال جون میں کمپنی کے گودام پر ایف ڈی اے کے چھاپے کے بعد کی گئی، جہاں 11.19 لاکھ روپے مالیت کی شیڈول ایچ نسخے والی ادویات ضبط کی گئی تھیں۔ مہاراشٹر ایف ڈی اے کے مطابق نسخے والی دوا کی پیکیجنگ پر اسے ’’اینالجیسک اینڈ اینٹی پائریٹک‘‘ یعنی درد اور بخار کی دوا کے طور پر فروغ دینے والا غیر مجاز تشہیری متن درج تھا۔
ایف ڈی اے نے کہا کہ نسخے والی ادویات کی اس طرح غیر مجاز تشہیر لوگوں کو خود سے دوا استعمال کرنے کی ترغیب دے سکتی ہے اور صحت عامہ کے لیے خطرہ بن سکتی ہے۔ کمپنی نے بعد میں جاری کی گئی ادویات واپس لینے کی ہدایات پر بھی مناسب طریقے سے عمل نہیں کیا۔ بعد کی جانچ میں ضابطوں کی پابندی سے متعلق کئی دیگر سنگین خامیاں بھی سامنے آئیں۔ ان میں موجود اسٹاک اور کمپیوٹرائزڈ خرید و فروخت کے ریکارڈ میں فرق شامل تھا۔ معائنے کے دوران ادویات واپس لینے کی ہدایات پر عمل نہ کرنے، ادویات کو براہِ راست فرش پر رکھنے، پیلیٹ اور ریک کے نامناسب انتظام سمیت ذخیرہ کرنے کے ناقص حالات بھی پائے گئے۔ اس کے علاوہ ریکارڈ رکھنے اور زائد المیعاد ادویات کے انتظام سے متعلق طریقۂ کار میں بھی خامیاں سامنے آئیں۔
