پٹنہ/ آواز دی وائس

لوک جن شکتی پارٹی (رام ولاس) کے سربراہ چراغ پاسوان نے جمعہ کے روز مہاگٹھ بندھن پر الزام لگایا کہ وہ صرف ووٹ بینک کی سیاست پر توجہ دے رہا ہے۔ انہوں نے کہا کہ اس اتحاد کے رہنما مسلمانوں کی بات تو کرتے ہیں مگر انہیں مناسب نمائندگی نہیں دیتے، اور ان کا مقصد عوامی فلاح کے بجائے ذاتی مفادات ہیں۔ لوک جن شکتی پارٹی (رام ولاس) کے سربراہ نے آر جے ڈی (راشٹریہ جنتا دل) کے تیجسوی یادو کو وزیرِ اعلیٰ بنائے جانے کے فیصلے پر بھی تنقید کی۔

صحافیوں سے گفتگو کرتے ہوئے چراغ پاسوان نے کہا کہ یہ لوگ صرف اپنا ووٹ بینک محفوظ رکھنا چاہتے ہیں۔ یہ مسلمانوں کی بات کرتے ہیں، لیکن جب نمائندگی دینے کی بات آتی ہے تو انہیں کچھ نہیں دیتے... مکیش سہنی کو نائب وزیرِ اعلیٰ کے چہرے کے طور پر پیش کیا گیا ہے، لیکن وہ اپنی برادری کے لوگوں کو نمائندگی دینے کی پرواہ نہیں کرتے... جو لوگ انتخابی مہم میں باہر نہیں نکلے، وہ بہاری عوام کے لیے کیسے کام کریں گے؟ مہاگٹھ بندھن میں اصل لڑائی عوامی خدمت کی نہیں بلکہ ذاتی مفاد کی ہے۔ پاسوان نے مزید کہا کہ مسلمانوں کو این ڈی اے حکومت کی ان اسکیموں کو سمجھنا چاہیے جو سبھی کے مفاد کے لیے بنائی گئی ہیں۔

انہوں نے کہا کہ یہ وہی آر جے ڈی ہے جس سے میرے والد نے 2005 میں کہا تھا کہ انہیں کسی مسلمان کو وزیرِ اعلیٰ بنانا چاہیے۔ مگر انہوں نے کبھی کسی مسلمان کو وزیرِ اعلیٰ نہیں بنایا... یہ کچھ اور کہتے ہیں اور کرتے کچھ اور ہیں۔ مسلمانوں کے لیے یہ صرف ووٹ بینک ہیں۔ مسلمانوں کو یہ سمجھنا چاہیے کہ ہماری حکومت کی اسکیمیں سبھی کو فائدہ پہنچانے کے لیے ہیں۔ اسی دوران، مرکزی مملکتی وزیر داخلہ نیتیانند رائے نے آر جے ڈی کے رہنما تیجسوی یادو پر سخت حملہ کرتے ہوئے انہیں بدعنوان قرار دیا اور کہا کہ وہ بدعنوانی کے الزامات میں قصوروار ثابت ہو چکے ہیں۔

انہوں نے کہا کہ جو شخص بدعنوانی کا دوسرا نام بن چکا ہے، اور جو بدعنوانی کے الزامات میں ثابت شدہ مجرم ہے، اگر وہ اس طرح کی باتیں کرتا ہے تو یہ اور بھی حیران کن ہے۔ بہار اس ایک شخص کی وجہ سے کئی سال پیچھے چلا گیا ہے، جس نے اپنے خاندان کے لیے بے پناہ دولت جمع کی اور سلطنتیں کھڑی کیں۔ تیجسوی یادو کے خلاف بدعنوانی کے الزامات ثابت ہو چکے ہیں، اب یہ ثابت کرنے کی کیا ضرورت ہے کہ وہ بدعنوان نہیں ہیں؟

جمعرات کو مہاگٹھ بندھن نے اپنے وزیرِ اعلیٰ کے امیدوار کے طور پر واضح اعلان کر دیا کہ راشٹریہ جنتا دل کے رہنما اور بہار اسمبلی میں قائدِ حزبِ اختلاف تیجسوی یادو اتحاد کے وزیرِ اعلیٰ کے چہرے ہوں گے۔ اسی کے ساتھ وکاس شیل انسان پارٹی کے مکیش سہنی کو نائب وزیرِ اعلیٰ کے امیدوار کے طور پر پیش کیا گیا۔ سال 2025 کے بہار اسمبلی انتخابات میں اہم مقابلہ این ڈی اے اور مہاگٹھ بندھن کے درمیان ہوگا۔

انتخابات دو مرحلوں میں ہوں گے ۔ 6 نومبر اور 11 نومبر کو  جبکہ نتائج کا اعلان 14 نومبر کو کیا جائے گا۔