نئی دہلی
انفورسمنٹ ڈائریکٹوریٹ (ای ڈی) نے منی لانڈرنگ کی تحقیقات کے تحت دبئی میں واقع تقریباً 1700 کروڑ روپے مالیت کی نئی غیر منقولہ جائیدادیں ضبط کر لی ہیں، جو مبینہ طور پر “غیر قانونی” مہادیو آن لائن بیٹنگ ایپ کے اہم پروموٹر سوربھ چندراکر سے منسلک اداروں کی ہیں۔ ذرائع نے بدھ کے روز یہ معلومات دی۔مرکزی تحقیقاتی ایجنسی پہلے ہی بتا چکی ہے کہ اس معاملے میں چھتیس گڑھ کے کئی اعلیٰ سطح کے سیاستدان اور افسران بھی شامل ہیں۔
ذرائع کے مطابق، ای ڈی کے رائے پور (چھتیس گڑھ) میں واقع علاقائی دفتر نے پریوینشن آف منی لانڈرنگ ایکٹ کے تحت عارضی حکم جاری کرتے ہوئے کئی ولاز اور مہنگے مکانات کو ضبط کیا ہے، جن میں دنیا کی بلند ترین عمارت برج خلیفہ میں واقع کچھ جائیدادیں بھی شامل ہیں۔
ذرائع کے مطابق، ضبط کی گئی جائیدادیں سوربھ چندراکر، اس سے منسلک کمپنیوں اور اس کے ساتھیوں سے جڑی ہوئی ہیں۔
انہوں نے بتایا کہ حالیہ حکم کے تحت کچھ جائیدادیں ہندوستان میں بھی واقع ہیں۔مہادیو ایپ کو سوربھ چندراکر اور اس کے ساتھی روی اپل نے فروغ دیا تھا، جو دونوں چھتیس گڑھ سے تعلق رکھتے ہیں۔ حکام ان دونوں کی حوالگی (ایکسٹراڈیشن) کی کوشش کر رہے ہیں۔ سوربھ چندراکر کی آخری معلوم مقام متحدہ عرب امارات بتایا جاتا ہے، جبکہ روی اپل کے بارے میں کہا جاتا ہے کہ وہ یو اے ای سے فرار ہو کر وانوآتو پہنچ گیا ہے۔
الزام ہے کہ چندراکر اور اس کے ساتھیوں نے مہادیو ایپ کے ذریعے عوام کو دھوکہ دیا۔ یہ ایپ مختلف غیر قانونی بیٹنگ ویب سائٹس اور موبائل ایپلی کیشنز کے لیے صارفین کو راغب کرنے اور ان کے مالی لین دین کو سنبھالنے کے مقصد سے تیار کی گئی تھی۔
