بھوپال: مدھیہ پردیش حکومت اتوار کو وزیر اعلیٰ موہن یادو کی صدارت میں بھوپال کے مضافات میں واقع جگدیش پور (سابق اسلام نگر) میں خصوصی کابینہ اجلاس منعقد کرے گی۔ یہ اجلاس سیاسی اور انتظامی اعتبار سے اہم مانا جا رہا ہے، کیونکہ اس میں یکساں سول کوڈ (UCC) بل کے مسودے کو منظوری دیے جانے کا امکان ہے۔

کابینہ کی منظوری کے بعد یہ بل 20 جولائی سے شروع ہونے والے مدھیہ پردیش اسمبلی کے مانسون اجلاس میں پیش کیا جائے گا۔ اجلاس کے لیے تمام انتظامات مکمل کر لیے گئے ہیں اور انتظامیہ نے آخری تیاریاں بھی مکمل کر لی ہیں۔ جمعہ کو کٹنی ضلع میں ایک عوامی اجتماع سے خطاب کرتے ہوئے وزیر اعلیٰ موہن یادو نے کہا تھا کہ خصوصی کابینہ اجلاس میں یو سی سی بل کی منظوری دی جائے گی، جس کے بعد اسے اسمبلی کے مانسون اجلاس میں پیش کیا جائے گا۔

انہوں نے کہا، "ہم 'ایک ملک، ایک قانون' کے اصول پر آگے بڑھ رہے ہیں۔ اسمبلی میں بل پیش کرنے سے پہلے اسے جگدیش پور میں ہونے والے خصوصی کابینہ اجلاس میں منظور کیا جائے گا۔" موہن یادو نے کہا کہ جگدیش پور کبھی بھوپال ریاست کا قدیم دارالحکومت تھا، جس کا نام حملہ آوروں نے بدل کر اسلام نگر رکھ دیا تھا، لیکن اب اسے دوبارہ جگدیش پور کر دیا گیا ہے، اور اسی تاریخی مقام پر یو سی سی بل کی منظوری دی جائے گی۔

واضح رہے کہ اسلام نگر کا نام یکم فروری 2023 کو سرکاری طور پر تبدیل کرکے جگدیش پور رکھا گیا تھا۔ مدھیہ پردیش اسمبلی کا پانچ روزہ مانسون اجلاس 20 جولائی سے شروع ہوگا، جس میں یو سی سی بل پیش کیے جانے کی توقع ہے۔