کشن گنج: بہار اسمبلی انتخابات کی تاریخ کا اعلان ابھی نہیں ہوا ہے، لیکن ریاست کا سیاسی درجۂ حرارت پوری طرح بڑھ چکا ہے۔ سیمانچل "انصاف یاترا" پر نکلے آل انڈیا مجلس اتحاد المسلمین (ایم آئی ایم) کے سربراہ اسد الدین اویسی نے بدھ کے روز بہار انتخابات کا باضابطہ بگل بجا دیا۔

کشن گنج پہنچے اویسی نے مہاگٹھ بندھن پر سخت حملہ کیا اور کہا کہ بہار کی عوام دیکھ رہی ہے کہ کون بھارتیہ جنتا پارٹی کو کامیاب کرنا چاہتا ہے۔ مہاگٹھ بندھن میں شامل نہ کیے جانے کے سوال پر اویسی نے کہا: بہار کی عوام دیکھ رہی ہے کہ بی جے پی کی بی ٹیم کون ہے؟

ہمارے صوبائی صدر اختر الایمان نے اپوزیشن لیڈر تیجسوی یادو کو خط لکھا، میڈیا کے ذریعے پیغام بھیجا کہ ہم اتحاد میں شامل ہونا چاہتے ہیں اور صرف 6 نشستوں کی مانگ کی گئی، لیکن کوئی جواب نہیں آیا۔ اویسی نے کہا کہ ہم نے اپنا فرض نبھایا ہے اور بہار کی عوام دیکھ رہی ہے کہ کون بی جے پی کو کامیاب کرنا چاہتا ہے۔

جب ان سے پوچھا گیا کہ مجلس پارٹی بہار میں کتنی نشستوں پر انتخاب لڑے گی تو انہوں نے اس سوال کو ٹال دیا اور کہا کہ جب فہرست جاری ہوگی تو سب کو پتہ چل جائے گا۔ ساتھ ہی کسی دوسری پارٹی کے ساتھ اتحاد کے سوال پر بھی انہوں نے کوئی جواب نہیں دیا۔ اسی دوران "آئی لَو محمد" معاملے پر بات کرتے ہوئے اویسی نے کہا کہ ہر مسلمان نبی اکرم ﷺ سے محبت کرتا ہے، کیونکہ یہ ان کے ایمان کا حصہ ہے۔ انہوں نے کہا کہ پوسٹر لگانے سے روکنا بالکل غلط ہے۔

جب ان سے تیجسوی یادو کے اس بیان پر سوال کیا گیا کہ ڈگری یافتہ نوجوانوں کو پہلے روزگار دیا جائے، تو اویسی نے کہا کہ انہیں بتانا چاہیے کہ بہار میں کتنے نوجوان گریجویشن پاس ہیں۔ اس پریس کانفرنس میں صوبائی صدر اختر الایمان سمیت دیگر رہنما بھی موجود تھے۔