نئی دہلی۔ 6 نومبر۔ الیکشن کمیشن آف انڈیا نے جمعرات کے روز بہار کے تمام اہل ووٹروں سے اپیل کی کہ وہ ووٹ ڈالنے کے اپنے حق کا استعمال کریں۔ کمیشن نے کہا کہ ’’بہار تیار ہے‘‘ جمہوریت کے تہوار کے لیے کیونکہ 2025 کے اسمبلی انتخابات کے پہلے مرحلے کی ووٹنگ جمعرات کو شروع ہوگئی۔الیکشن کمیشن نے ایک پیغام میں لکھا کہ ’’لوکتنتر کا تہوار۔ بہار تیار ہے۔ تمام ووٹروں کو پولنگ اسٹیشن پر خوش آمدید۔‘‘

بہار اسمبلی کے 2025 انتخابات کے پہلے مرحلے میں صبح 7 بجے سے ووٹنگ شروع ہوئی۔ اس مرحلے میں ریاست کے 18 اضلاع کی 121 اسمبلی نشستوں پر تقریباً 3.75 کروڑ ووٹرز اپنا حق رائے دہی استعمال کر رہے ہیں۔ ووٹنگ شام 6 بجے تک جاری رہے گی تاہم بعض حساس حلقوں میں حفاظتی وجوہات کی بنا پر پولنگ کا وقت 5 بجے تک محدود کر دیا گیا ہے۔

پہلے مرحلے میں کئی اہم رہنماؤں کی قسمت کا فیصلہ ہوگا جن میں آر جے ڈی کے تیجسوی پرساد یادو، بی جے پی کے سمرات چودھری اور منگل پانڈے، جے ڈی (یو) کے شروان کمار اور وجے کمار چودھری شامل ہیں۔اننت سنگھ اور تیج پرتاپ یادو بھی پہلے مرحلے میں میدان میں ہیں۔ تیج پرتاپ یادو جنتا دل (جن شکتی) کی جانب سے بھی امیدوار ہیں۔

الیکشن کمیشن کے مطابق 10.72 لاکھ نئے ووٹرز پہلی مرتبہ اپنا ووٹ ڈالیں گے جبکہ 18 سے 19 سال کی عمر کے ووٹروں کی تعداد 7.78 لاکھ ہے۔ ان حلقوں کی مجموعی آبادی 6.60 کروڑ بتائی گئی ہے۔پولنگ کے دن سے قبل پریزائیڈنگ افسران نے ای وی ایم مشینیں پولنگ ایجنٹس کے حوالے کر دی ہیں۔

مرکزی شہر پٹنہ کی سپرنٹنڈنٹ آف پولیس دیکشا نے بتایا کہ شہر میں پرامن ووٹنگ کے لیے تمام انتظامات مکمل کر لیے گئے ہیں۔ انہوں نے کہا کہ علاقے کی نگرانی، پیٹرولنگ، اور مختلف زونل سطح پر چیکنگ کی جائے گی۔ کوئیک ریسپانس ٹیمیں تعینات ہیں۔ خواتین اور معذور ووٹروں کے لیے مخصوص بوتھ قائم کیے گئے ہیں۔ سی اے پی ایف اور ریاستی پولیس کے اہلکار تعینات کیے گئے ہیں۔ بعض علاقوں میں کشتیوں کے ذریعے بھی پولنگ پارٹیوں کو پہنچانے کا بندوبست کیا گیا ہے۔2025 کے بہار انتخابات میں قومی جمہوری اتحاد اور مہاگٹھ بندھن کے درمیان براہ راست مقابلہ ہے۔ریاست کے باقی 122 حلقوں میں دوسرے مرحلے کی ووٹنگ 11 نومبر کو ہوگی جبکہ ووٹوں کی گنتی 14 نومبر کو کی جائے گی۔