نئی دہلی: اٹھارہویں لوک سبھا کے آٹھویں اجلاس میں حکومت اپنی قانون سازی کی سرگرمیوں کو تیز کرنے کی تیاری کر رہی ہے۔ سرکاری ذرائع کے مطابق اجلاس کے دوران دو زیر التوا بلوں کو نمٹانے کو ترجیح دی جائے گی جبکہ پانچ نئے بل بھی پیش کیے جائیں گے۔

حکومت جن دو پرانے بلوں کو آگے بڑھانے کا ارادہ رکھتی ہے ان میں فارن کنٹری بیوشن ریگولیشن ترمیمی بل 2026 اور وکست بھارت شکشا ادھیشٹھان بل 2025 شامل ہیں۔ وکست بھارت شکشا ادھیشٹھان بل 15 دسمبر 2025 کو لوک سبھا میں پیش کیا گیا تھا اور بعد میں اسے مشترکہ پارلیمانی کمیٹی کے سپرد کر دیا گیا تھا۔

اس کے علاوہ حکومت پانچ نئے بل بھی ایوان میں پیش کرے گی۔ ان میں انکم ٹیکس ترمیمی بل 2026 اور سپریم کورٹ ججوں کی تعداد ترمیمی بل 2026 شامل ہیں جو موجودہ آرڈیننسوں کی جگہ لیں گے۔ اس کے ساتھ پیدائش اور اموات کے اندراج سے متعلق ترمیمی بل 2026 قومی وقار کی توہین کی روک تھام ترمیمی بل 2026 اور خرد۔ چھوٹے اور متوسط درجے کے صنعتوں کی ترقی ترمیمی بل 2026 بھی پیش کیے جائیں گے۔

دوسری جانب پارلیمنٹ کے مانسون اجلاس کے آغاز کے دن 20 جولائی کو راجیہ سبھا اور لوک سبھا میں اپوزیشن جماعتوں کے قائدین مشترکہ حکمت عملی طے کرنے کے لیے اجلاس کریں گے۔ پارلیمنٹ کا مانسون اجلاس 20 جولائی سے 13 اگست تک جاری رہے گا۔

اپوزیشن جماعتیں حکومت کے قانون سازی کے ایجنڈے کے ساتھ ساتھ ان اہم مسائل پر بھی غور کریں گی جنہیں وہ اجلاس کے دوران اٹھانا چاہتی ہیں۔

کانگریس کے سینئر رہنما جے رام رمیش نے جمعرات کو کہا کہ اگر حد بندی بل دوبارہ مانسون اجلاس میں پیش کیا گیا تو کانگریس اس کی بھرپور مخالفت کرے گی۔ ان کا الزام تھا کہ مرکزی حکومت ایسے بل کی حمایت حاصل کرنے کی کوشش کر رہی ہے جو پہلے لوک سبھا میں مطلوبہ دو تہائی اکثریت حاصل کرنے میں ناکام رہا تھا۔

جے رام رمیش نے کہا کہ کانگریس وکست بھارت شکشا ادھیشٹھان بل 2025 کے علاوہ فارن کنٹری بیوشن ریگولیشن قانون اور قومی غذائی تحفظ قانون 2013 میں مجوزہ ترامیم کی بھی مخالفت کرے گی۔

ادھر حکومت نے 19 جولائی کو کل جماعتی اجلاس طلب کیا ہے۔ توقع ہے کہ اس اجلاس میں حکومت اپنا قانون سازی کا ایجنڈا پیش کرے گی جبکہ اپوزیشن جماعتیں اجلاس کے دوران اٹھائے جانے والے مسائل سے حکومت کو آگاہ کریں گی۔ ہر پارلیمانی اجلاس سے قبل منعقد ہونے والا یہ کل جماعتی اجلاس صبح 11 بجے شروع ہونے کا امکان ہے۔

توقع کی جا رہی ہے کہ مانسون اجلاس میں کئی اہم بلوں پر بحث ہوگی۔ حالیہ ہفتوں میں بعض اپوزیشن جماعتوں میں اختلافات اور اندرونی تقسیم کے باعث اجلاس کے ہنگامہ خیز رہنے کے امکانات بھی ظاہر کیے جا رہے ہیں۔

اپوزیشن نیٹ یو جی پرچہ افشا معاملہ اور آپریشن سندور میں جانی نقصان سے متعلق وزیر دفاع راج ناتھ سنگھ کے بیان کا معاملہ بھی پارلیمنٹ میں اٹھا سکتی ہے۔

مرکزی وزیر برائے پارلیمانی امور کرن ریجیجو پہلے ہی اعلان کر چکے ہیں کہ پارلیمنٹ کا مانسون اجلاس 20 جولائی سے 13 اگست تک منعقد ہوگا۔