جموئی/ آواز دی وائس

مرکزی وزیرِ داخلہ امت شاہ نے جمعہ کے روز اپوزیشن جماعتوں کے رہنماؤں پر سخت حملہ کرتے ہوئے الزام لگایا کہ راشٹریہ جنتا دل (آرجے ڈی) اور کانگریس کے اتحاد کے پاس بہار کی ترقی کا کوئی ایجنڈا نہیں ہے۔ انہوں نے کہا کہ ان کے دورِ حکومت میں غریبوں کے لیے کچھ نہیں کیا گیا بلکہ دراندازوں کو تحفظ فراہم کیا گیا۔

امت شاہ نے یہاں ایک انتخابی ریلی سے خطاب کرتے ہوئے آرجے ڈی کے سربراہ لالو پرساد یادو اور کانگریس کی سینئر رہنما سونیا گاندھی پر نشانہ سادھا۔ انہوں نے کہا کہ جو لوگ صرف اپنے بیٹے بیٹیوں کے مفاد کی فکر کرتے ہیں، وہ بہار کو ترقی یافتہ ریاست نہیں بنا سکتے۔ انہوں نے کہا کہ ہمیں پانچ سال کا اور موقع دیجیے، بہار کو ترقی یافتہ ریاستوں کی صف میں شامل کر دیا جائے گا۔ ریاست کو سیلاب کے مسئلے سے نجات دلائی جائے گی۔ لالو، رابڑی اور راہل کے پاس ترقی کا کوئی ایجنڈا نہیں ہے۔

شاہ نے الزام لگایا کہ ان لوگوں نے غریبوں کے لیے کچھ نہیں کیا، سوائے ان دراندازوں کو پناہ دینے کے جو غریبوں کی نوکریاں، راشن اور وسائل چھین رہے ہیں۔ کیا ایسے لوگ بہار کو ترقی یافتہ بنا سکتے ہیں؟ کبھی نہیں۔ انہوں نے کہا کہ لالو پرساد کے دورِ حکومت میں گیا، اورنگ آباد، جموئی اور دیگر علاقوں میں ماؤ نواز تشدد اپنی انتہا پر تھا۔ امت شاہ نے دعویٰ کیا کہ وزیرِ اعظم نریندر مودی کی قیادت میں بہار سے نکسل ازم کا صفایا کیا گیا ہے۔ وزیرِ داخلہ نے ووٹروں سے اپیل کرتے ہوئے کہا کہ اگر آپ جنگل راج سے بچنا چاہتے ہیں، تو این ڈی اے کو ووٹ دیجیے۔

انہوں نے یہ بھی وعدہ کیا کہ قومی جنتانترک اتحاد (این ڈی اے) کو دوبارہ موقع ملنے پر بہار کی تصویر بدل دی جائے گی۔ بھارتیہ جنتا پارٹی (بی جے پی) کے سابق صدر نے اس موقع پر کئی منصوبوں کا اعلان کیا، جن میں ایک الیکٹرک وہیکل مینوفیکچرنگ کلسٹر، اسلحہ فیکٹری، دفاعی کاریڈور، عالمی معیار کے ایکسپریس وے اور شاہراہوں کا نیٹ ورک، میڈیکل کالج اور انجینئرنگ اداروں کا قیام شامل ہے۔