پٹنہ: بہار حکومت نے ہفتے کے روز راشٹریہ جنتا دل (آر جے ڈی) کے سربراہ لالو پرساد یادو اور سابق وزیر اعلیٰ رابڑی دیوی کی زیڈ (Z) کیٹیگری سکیورٹی باضابطہ طور پر بحال کر دی۔ محکمہ داخلہ کی اسپیشل برانچ کی جانب سے جاری سرکاری حکم نامے کے مطابق یہ فیصلہ ریاستی سکیورٹی کمیٹی کی سفارش پر کیا گیا ہے۔

نئے سکیورٹی انتظامات کے تحت دونوں رہنماؤں کو ایک بلٹ پروف گاڑی اور ہیڈکوارٹر ری ایکشن ٹیم (HQRT) کی خصوصی سکیورٹی فراہم کی جائے گی۔ اس فیصلے کے بعد لالو پرساد اور رابڑی دیوی کی سکیورٹی مزید مضبوط کر دی گئی ہے، تاکہ موجودہ سیاسی حالات کے پیشِ نظر ان کی حفاظت کو یقینی بنایا جا سکے۔

واضح رہے کہ 6 جون کو بہار حکومت نے لالو پرساد اور رابڑی دیوی کی زیڈ پلس سکیورٹی واپس لینے کا حکم دیا تھا، جس کے بعد دونوں رہنماؤں نے پٹنہ میں واقع اپنی رہائش گاہ 10 سرکولر روڈ کے باہر تعینات باقی سکیورٹی اہلکاروں کو بھی واپس بھیج دیا تھا۔

یہ پیش رفت اس وقت سامنے آئی تھی جب بہار حکومت نے رابڑی دیوی کو 10 سرکولر روڈ کا سرکاری بنگلہ خالی کرنے کا نوٹس جاری کیا تھا۔ یہ رہائش گاہ بعد میں بہار کے وزیر نند کشور رام کو الاٹ کر دی گئی۔ حکومت نے اپنے نوٹس میں کہا تھا کہ رابڑی دیوی کو بہار قانون ساز کونسل میں قائدِ حزبِ اختلاف کی حیثیت سے ہارڈنگ روڈ پر متبادل سرکاری رہائش پہلے ہی الاٹ کی جا چکی تھی، تاہم وہ وہاں منتقل نہیں ہوئی تھیں۔