نئی دہلی
کانگریس نے جمعرات کو کہا کہ نجی کارپوریٹ سرمایہ کاری میں تیزی کا فقدان ملک کو درپیش سب سے بڑا معاشی چیلنج ہے، جبکہ معاشی طاقت کا بڑھتا ہوا ارتکاز سرمایہ کاری کی ترقی کو متاثر کر رہا ہے۔پارٹی کے جنرل سکریٹری جے رام رمیش نے یہ الزام بھی عائد کیا کہ اب "سیاسی سرپرستی یافتہ" نجی سرمایہ کاری وسیع پیمانے پر ہونے والی نجی سرمایہ کاری کو پیچھے دھکیل رہی ہے۔
رمیش نے سوشل میڈیا پلیٹ فارم ایکس پر ایک خبر شیئر کی، جس میں کہا گیا تھا کہ 31 مارچ 2026 کو ختم ہونے والے مالی سال میں ملک کے مجموعی نجی سرمایہ جاتی اخراجات (کیپیٹل ایکسپینڈیچر) کا تقریباً ایک تہائی حصہ صرف اڈانی گروپ کے حصے میں آیا۔
انہوں نے کہا کہ نجی کارپوریٹ سرمایہ کاری میں تیزی کا فقدان ہندوستان کے سامنے سب سے سنگین چیلنج ہے۔ اس کے کئی اسباب ہیں، جن میں حقیقی اجرتوں کا جمود بھی شامل ہے، جس کی وجہ سے تمام آمدنی والے طبقات میں کھپت کی شرح نمو متاثر ہو رہی ہے۔انہوں نے مزید کہا کہ بلند افراطِ زر کی وجہ سے گھریلو بچت کی شرح میں بھی نمایاں کمی آئی ہے۔
جے رام رمیش کے مطابق نجی کارپوریٹ سرمایہ کاری میں سست روی کی ایک بڑی وجہ نافذ کرنے والے اداروں، ٹیکس حکام اور تفتیشی ایجنسیوں کے "چھاپہ راج" سے پیدا ہونے والا خوف اور دباؤ کا ماحول بھی ہے۔
انہوں نے الزام لگایا کہ سرمایہ کاری سے متعلق اہم پالیسیوں میں تسلسل اور شفافیت کا فقدان، اور چین سے درآمدات میں مسلسل اضافہ، جس نے مقامی طور پر تیار کی جانے والی مصنوعات کی منڈی کو نقصان پہنچایا ہے، بھی اس صورتحال کے ذمہ دار ہیں۔
رمیش نے کہا کہ معاشی طاقت کا بڑھتا ہوا ارتکاز بھی سرمایہ کاری کی شرح نمو کی حوصلہ شکنی کر رہا ہے۔
