نئی دہلی

کانگریس صدر ملکارجن کھرگے نے منگل کے روز پٹرول اور ڈیزل کی قیمتوں میں اضافے کو لے کر وزیر اعظم نریندر مودی پر شدید تنقید کی اور الزام لگایا کہ عام لوگوں کو لوٹنا اور اڈانی کو امریکہ سے ’’کلین چٹ‘‘ دلانا اُن کا ’’سمجھوتہ شدہ ماڈل‘‘ ہے۔کھرگے نے بی جے پی پر دور اندیشی اور قیادت کی کمی کا الزام بھی عائد کیا۔

اُن کا یہ بیان اُس وقت سامنے آیا جب منگل کے روز پٹرول اور ڈیزل کی قیمتوں میں تقریباً 90 پیسے فی لیٹر کا اضافہ کیا گیا۔ سرکاری تیل کمپنیوں کی جانب سے تقریباً 4 سال بعد قیمتوں میں تبدیلی پر عائد پابندی ختم ہونے کے بعد ایک ہفتے سے بھی کم عرصے میں یہ دوسرا اضافہ ہے۔

کھرگے نے ایکس پر لکھا کہ قیمتوں میں اضافے کے صرف 4 دن بعد مودی حکومت نے ایک بار پھر پٹرول اور ڈیزل مہنگا کر دیا ہے۔ پہلے ماحول بنایا گیا، پھر بچت کا درس دیتے ہوئے اپنی ناکامیوں کا بوجھ عوام پر ڈال دیا گیا، اور اب یہ مہم پوری رفتار سے جاری ہے۔

انہوں نے الزام لگایا کہ عام آدمی کو لوٹنا اور اڈانی کو امریکہ سے آزاد راستہ دلانا ہی مودی جی کا سمجھوتہ شدہ ماڈل ہے۔وہ امریکہ کے محکمۂ انصاف کی جانب سے صنعت کار گوتم اڈانی اور اُن کے بھتیجے ساگر اڈانی کے خلاف تمام فوجداری الزامات مستقل طور پر واپس لینے کے فیصلے کا حوالہ دے رہے تھے، جس کے بعد نیویارک میں جاری ایک اہم مالیاتی دھوکہ دہی کا مقدمہ مکمل طور پر ختم ہو گیا۔

روسی تیل کی خریداری کے معاملے کا ذکر کرتے ہوئے کھرگے نے کہا کہ خود کو ’وشو گرو‘ کہنے والے مودی جی نے روسی تیل خریدنے کی ’اجازت‘ کے لیے امریکہ سے ایک ماہ کی توسیع کی بھیک مانگی۔ جب بھی وہ ایسا کرتے ہیں، 1.4 ارب ہندوستانیوں کی عزت کو ٹھیس پہنچتی ہے۔ اس سے پہلے کسی حکومت نے اتنی پستی نہیں دکھائی۔

انہوں نے سوال کیا کہ اگر حکومت کے مطابق ہمیں یہ کام کرنے کی اجازت مل گئی ہے، تو پھر پٹرول اور ڈیزل کی قیمتوں میں اضافے کا بوجھ عوام پر کیوں ڈالا جا رہا ہے؟کھرگے نے کہا کہ میں ایک بار پھر دہراتا ہوں کہ بی جے پی میں نہ دور اندیشی ہے اور نہ قیادت۔واضح رہے کہ روسی خام تیل کی فروخت اور سپلائی سے متعلق امریکی پابندیوں میں عارضی نرمی 16 مئی کو ختم ہو گئی تھی۔ واشنگٹن نے دوسری بار اس رعایت کی مدت ختم ہونے دی، بغیر یہ واضح کیے کہ اس میں توسیع ہوگی یا نہیں۔یہ خصوصی اجازت نامہ امریکی محکمۂ خزانہ نے مارچ کے وسط میں جاری کیا تھا اور اپریل میں اس میں توسیع کی گئی تھی، تاکہ ایران کے خلاف امریکہ-اسرائیل جنگ کے بعد عالمی تیل سپلائی میں پیدا ہونے والے بحران کے اثرات کو کم کیا جا سکے۔

پٹرولیم وزارت کے ایک سینئر افسر نے پیر کے روز کہا تھا کہ ہندوستان امریکی پابندیوں میں نرمی سے قطع نظر روسی تیل خریدتا رہا ہے اور توانائی کی ضروریات اور تجارتی فائدے کو دیکھتے ہوئے آئندہ بھی خریدتا رہے گا۔راجیہ سبھا میں قائدِ حزبِ اختلاف کھرگے نے کہا کہ جب بحران پیدا ہوا تو بی جے پی رہنما انتخابات میں مصروف تھے، پھر انہوں نے ’’لوٹ‘‘ کی منصوبہ بندی کے لیے چکنی چپڑی باتیں شروع کر دیں، اور اسی دوران ’’اپنے سب سے عزیز دوست کو بھی بچا لیا۔

انہوں نے کہا کہ بیرونِ ملک اسپانسر شدہ تشہیر کر لینے سے کوئی ’وشو گرو‘ نہیں بن جاتا۔ مودی جی، آپ کو عوام کے سامنے جواب دہ ہونا پڑے گا۔کھرگے نے کہا کہ حقیقی سوالات سے بھاگنے کی کوشش نہ کریں۔ عوام کو اس بات میں کوئی دلچسپی نہیں کہ آپ آم کیسے کھاتے ہیں یا کون سا ٹانک پیتے ہیں۔

انہوں نے مزید کہا کہ اگر آپ یہ بتائیں کہ اس بحران سے نمٹنے کے لیے واقعی کیا کر رہے ہیں، تبھی آپ عوام کے حقیقی ’پردھان سیوک‘ کہلائیں گے، ورنہ صرف ایک ’پرچارک‘ بن کر رہ جائیں گے۔