نئی دہلی

مرکزی وزیر ریلوے اشونی ویشنو نے جمعرات کے روز کہا کہ مجوزہ کوتیشور روڈ-احمد آباد ایئرپورٹ میٹرو کوریڈور احمد آباد میں ایئرپورٹ اور سردار پٹیل اسپورٹس انکلیو جیسے اہم بنیادی ڈھانچے کے مراکز تک رابطہ کاری کو نمایاں طور پر بہتر بنائے گا، جس سے شہری آمد و رفت مزید آسان ہو جائے گی۔

اشونی ویشنو نے سوشل میڈیا پلیٹ فارم "ایکس" پر لکھا کہ کوتیشور روڈ-احمد آباد ایئرپورٹ میٹرو کوریڈور ایئرپورٹ اور سردار پٹیل اسپورٹس انکلیو تک رسائی کو بہتر بنائے گا، جس سے شہری نقل و حرکت اور بھی سہل ہو جائے گی۔دوسری جانب، وزیر اعظم نریندر مودی کی صدارت میں اقتصادی امور سے متعلق کابینہ کمیٹی نے بدھ کے روز آندھرا پردیش کے نئے دارالحکومت امراوتی میں مرکزی حکومت کے جنرل پول آفس اکاموڈیشن  کی تعمیر کی منظوری بھی دے دی۔

اس منصوبے کا مقصد مرکزی حکومت کے مختلف دفاتر کے لیے بڑھتی ہوئی دفتری جگہ کی ضرورت کو پورا کرنا اور مختلف دفاتر کو ایک ہی مقام پر یکجا کرنا ہے۔اس سے قبل وزیر اعظم نریندر مودی نے زور دیتے ہوئے کہا تھا کہ احمد آباد میٹرو ریل پروجیکٹ کے فیز 2(اے) کے کامیاب نفاذ کے بعد گجرات کے شہر احمد آباد میں شہری ترقی اور جدید کاری کے عمل کو مزید رفتار مل رہی ہے۔"ایکس" پر ایک پوسٹ شیئر کرتے ہوئے وزیر اعظم نے کہا کہ میٹرو نیٹ ورک کی توسیع سے ٹریفک کا دباؤ کم ہوگا، روزگار کے مواقع پیدا ہوں گے اور پائیدار شہری ترقی کو فروغ ملے گا۔

اپنی پوسٹ میں انہوں نے کہا کہ احمد آباد کی شہری ترقی مزید رفتار حاصل کر رہی ہے۔ احمد آباد میٹرو ریل پروجیکٹ کے فیز 2(اے) کی کابینہ سے منظوری رابطہ کاری کو مزید مضبوط بنائے گی، خاص طور پر ایئرپورٹ تک رسائی کو، جس سے سفر تیز تر اور زیادہ آسان ہو جائے گا۔ یہ توسیع ٹریفک کے دباؤ کو کم کرے گی، روزگار کے نئے مواقع پیدا کرے گی اور پائیدار شہری ترقی میں اہم کردار ادا کرے گی۔

بدھ کے روز وزیر اعظم نریندر مودی کی صدارت میں مرکزی کابینہ نے احمد آباد میٹرو ریل پروجیکٹ کے فیز 2(اے) کی منظوری دی، جس کے تحت 6.032 کلومیٹر طویل میٹرو کوریڈور اور پانچ اسٹیشن تعمیر کیے جائیں گے۔ ان میں چار ایلیویٹڈ اور ایک زیرِ زمین اسٹیشن شامل ہوگا۔

جاری بیان کے مطابق فیز 2(اے) کے فعال ہونے کے بعد احمد آباد-گاندھی نگر میٹرو نیٹ ورک کی مجموعی لمبائی 77.63 کلومیٹر تک پہنچ جائے گی۔فیز 2(اے) کوریڈور کے اسٹیشنوں میں آشرم روڈ، کوتیشور پراچین مندر، سابرمتی ریور، سردار نگر اور ایئرپورٹ شامل ہیں۔

اس منصوبے کی مجموعی لاگت، جس میں تعمیراتی مدت کے دوران سود (آئی ڈی سی) بھی شامل ہے، 2,169.04 کروڑ روپے ہوگی۔احمد آباد میٹرو ریل پروجیکٹ کا فیز 2(اے) شہر کے بنیادی ڈھانچے کی ترقی میں ایک اہم پیش رفت تصور کیا جا رہا ہے اور یہ شہر کے میٹرو نیٹ ورک کی ایک بڑی توسیع ثابت ہوگا۔

اس مرحلے کے تحت تقریباً 6.032 کلومیٹر طویل نئے میٹرو کوریڈور کی تعمیر کی جائے گی، جس کا مقصد عوامی نقل و حمل کو بہتر بنانا، ایئرپورٹ تک بلا رکاوٹ رسائی فراہم کرنا اور ان اہم رہائشی و تجارتی علاقوں کو جوڑنا ہے جہاں فی الحال مناسب سفری سہولیات دستیاب نہیں ہیں۔

یہ منصوبہ رہائشی اور تجارتی مراکز کو موجودہ احمد آباد-گاندھی نگر میٹرو کوریڈور سے مربوط کرے گا۔اس کے علاوہ 2029 کے ورلڈ پولیس گیمز اور 2030 کے دولتِ مشترکہ کھیلوں کے پیش نظر قریبی علاقوں میں کھیلوں کی جدید سہولیات کی ترقی کا بھی امکان ہے۔ان اہم علاقوں کو میٹرو نیٹ ورک سے جوڑنے کے نتیجے میں نہ صرف رابطہ کاری بہتر ہوگی بلکہ معاشی سرگرمیوں اور سیاحت کو بھی فروغ ملے گا، جبکہ شہریوں اور مسافروں کے لیے سفر مزید آسان اور مؤثر ہو جائے گا۔