کولکتہ: مرزا غالب اسٹریٹ پر واقع ایک ہوٹل میں پیش آنے والی المناک آتشزدگی کے واقعے میں 9 افراد کی ہلاکت کے بعد کولکتہ پولیس نے معاملے کی تحقیقات کے لیے خصوصی تحقیقاتی ٹیم تشکیل دے دی ہے۔پولیس کے مطابق بدھ کی علی الصبح ہوٹل میں آگ لگنے سے ایک بچے سمیت 9 افراد ہلاک ہوگئے۔ تقریباً 60 دیگر افراد کو بھی جلتی ہوئی عمارت سے بحفاظت باہر نکال لیا گیا۔

آتشزدگی کے بعد مغربی بنگال کی وزیر اگنی مترا پال نے کہا کہ حکومت کولکتہ کے مختلف ہوٹلوں کے اجازت ناموں اور فائر سیفٹی لائسنس کی جانچ کے لیے ایک ٹیم تشکیل دینے کا منصوبہ بنا رہی ہے۔ انہوں نے نشاندہی کی کہ مذکورہ عمارت کی مختلف منزلوں پر کئی ہوٹل قائم تھے اور کمروں کا حجم بھی بہت چھوٹا تھا۔اگنی مترا پال نے جائے وقوعہ کا دورہ کیا اور کہا کہ اس معاملے میں کارروائی کی جائے گی۔

انہوں نے صحافیوں سے گفتگو کرتے ہوئے کہا کہ ہم ایک ٹیم تشکیل دینے کا منصوبہ بنا رہے ہیں جو یہ جانچ کرے گی کہ ہوٹلوں کے پاس درست اجازت نامے اور فائر سیفٹی لائسنس موجود ہیں یا نہیں۔ ایک ہی عمارت کی 3 منزلوں پر 10 ہوٹل چلائے جا رہے ہیں اور ان میں چھوٹے چھوٹے کمرے ہیں۔ اس صورتحال کی اجازت نہیں دی جا سکتی۔انہوں نے کہا کہ پولیس ابھی یہ جانچ کر رہی ہے کہ متاثرین بنگلہ دیشی تھے یا ہندوستانی۔ تحقیقات کے بعد پولیس اس بارے میں تصدیق کرے گی۔ اس معاملے میں یقینی طور پر کارروائی کی جائے گی۔

ریاستی وزیر تاپس رائے نے بھی اسی نوعیت کے خدشات کا اظہار کرتے ہوئے کہا کہ ایسے ہوٹلوں کی جانچ کی جانی چاہیے جہاں مطلوبہ تمام لائسنس اور بنیادی سہولتیں موجود نہیں ہیں۔ انہوں نے کہا کہ ایسی تمام جگہوں کا معائنہ اور تلاشی لینے کے لیے ایک ٹیم تشکیل دی جائے گی۔انہوں نے کہا کہ اس طرح کے واقعات صرف یہاں نہیں ہو رہے بلکہ کولکتہ اور دیگر شہروں کے گنجان علاقوں میں بھی ایسے واقعات سامنے آ رہے ہیں۔ حکومت ایسے واقعات کے خلاف زیرو ٹالرنس کی پالیسی اختیار کرے گی۔مغربی بنگال کے وزیر کوشک چودھری نے کہا کہ اگر امدادی ٹیموں نے فوری کارروائی نہ کی ہوتی تو ہلاکتوں کی تعداد کہیں زیادہ ہوسکتی تھی۔

انہوں نے کہا کہ ہمارے پاس 9 افراد کی ہلاکت کی اطلاع ہے۔ ابھی تک آگ لگنے کی وجہ معلوم نہیں ہوسکی ہے۔ ہلاکتوں کی تعداد 100 تک پہنچ سکتی تھی لیکن ہم نے 80 افراد کو بچا لیا۔ بظاہر اموات دھوئیں کے باعث ہوئی ہیں۔ 9 افراد ہلاک ہوئے ہیں اور اس واقعے میں سخت کارروائی کی جائے گی۔

پولیس کے مطابق نیو مارکیٹ تھانے کو رات تقریباً 2 بجے آگ لگنے کی اطلاع ملی۔ اس کے فوراً بعد پولیس کی ایک ٹیم جائے وقوعہ پر روانہ کی گئی جبکہ فائر بریگیڈ اور سی ای ایس سی حکام کو بھی اطلاع دے کر فوری کارروائی کی ہدایت کی گئی۔طویل امدادی کارروائی کے بعد فائر بریگیڈ اور پولیس اہلکاروں نے ہوٹل کے احاطے سے تقریباً 60 افراد کو نکال کر محفوظ مقام پر پہنچایا۔

امدادی کارروائی کے دوران 9 افراد بے ہوشی کی حالت میں ملے جن میں 2 خواتین اور ایک بچہ شامل تھا۔ انہیں علاج کے لیے میڈیکل کالج اینڈ ہاسپٹل لے جایا گیا جہاں ڈاکٹروں نے معائنے کے بعد انہیں مردہ قرار دے دیا۔پولیس کے مطابق علاقے میں فی الحال صورتحال پُرامن اور قابو میں ہے۔ جائے وقوعہ پر خاطر خواہ پولیس اہلکار تعینات کیے گئے ہیں۔ واقعے کی جگہ کو محفوظ کرلیا گیا ہے اور شواہد بھی محفوظ رکھے گئے ہیں۔ قانون کے مطابق مزید کارروائی کی جا رہی ہے۔

پولیس نے کہا کہ آگ لگنے کی اصل وجہ ابھی معلوم نہیں ہوسکی ہے۔ مزید تفصیلات کا انتظار ہے۔یہ واقعہ ریاست میں ایک اور ہوٹل میں آتشزدگی کے صرف 2 روز بعد پیش آیا ہے۔ پیر کے روز بیربھوم ضلع کے تاراپیٹھ میں ایک ہوٹل میں مبینہ طور پر شارٹ سرکٹ کے باعث آگ لگنے سے 8 افراد ہلاک اور کئی دیگر زخمی ہوگئے تھے۔