نئی دہلی: راجیہ سبھا میں قائد حزب اختلاف ملکارجن کھرگے نے جمعہ کو ایک بار پھر مطالبہ کیا کہ مرکزی وزیر داخلہ امیت شاہ 20 جولائی کو مظاہرین کے خلاف پولیس کارروائی پر ایوان میں بیان دیں۔ اپوزیشن کے اس مطالبے اور مسلسل نعرے بازی کے درمیان راجیہ سبھا کی کارروائی دوپہر 12 بجے تک ملتوی کر دی گئی۔

کھرگے نے دعویٰ کیا کہ چیئرمین سی پی رادھا کرشنن نے امیت شاہ کو ایوان میں آکر بیان دینے کی ہدایت دی تھی، تاہم پارلیمانی امور کے وزیر کرن رجیجو نے اس دعوے کی تردید کی۔ کانگریس لیڈر نے کہا، ’’آپ (چیئرمین) نے وزیر داخلہ سے ایوان میں آکر بیان دینے کو کہا تھا، لیکن وہ (حکومتی ارکان) آپ کی بات کا احترام نہیں کر رہے اور ایوان کی توہین کر رہے ہیں۔‘

‘ اس پر اعتراض کرتے ہوئے کرن رجیجو نے کہا کہ اپوزیشن یہ طے نہیں کر سکتی کہ کون سا وزیر کب ایوان میں آئے گا۔ انہوں نے کہا، ’’قائد حزب اختلاف ایوان کو گمراہ کر رہے ہیں۔ چیئر کی جانب سے ایسی کوئی ہدایت نہیں دی گئی۔ میں ریکارڈ پر کہہ رہا ہوں کہ صبح پارلیمنٹ شروع ہونے سے لے کر رات تک وزیر داخلہ پارلیمنٹ میں موجود رہتے ہیں۔ ایوان کے سامنے موجود معاملے کا جواب متعلقہ وزیر ہی دیتا ہے۔

اپوزیشن یہ فیصلہ نہیں کرے گی کہ کون سا وزیر کب ایوان میں آئے گا۔‘‘ رجیجو نے مزید کہا کہ اپوزیشن ارکان صبح 11 بجے کے بعد چلے جاتے ہیں، جبکہ وزیر داخلہ پارلیمنٹ میں موجود رہتے ہیں۔ انہوں نے الزام لگایا کہ جب وزیر داخلہ جواب دینے کے لیے آئیں گے تو اپوزیشن ارکان ان کی بات نہیں سنیں گے اور ایوان میں خلل ڈالیں گے۔

اس سے قبل اپوزیشن ارکان نے ایودھیا میں رام مندر کے چندے میں مبینہ چوری اور طلبہ مظاہرین کے خلاف مبینہ ’’پولیس زیادتی‘‘ کے معاملے پر امیت شاہ سے بیان دینے کے مطالبے کو لے کر پارلیمنٹ ہاؤس کمپلیکس میں احتجاج کیا۔ بارش کے باوجود ارکان نے چھتریاں اور مرکزی حکومت کے خلاف نعروں والے پلے کارڈز اٹھا کر پارلیمنٹ کے مکر دوار کے سامنے احتجاج کیا۔ مظاہرین ’’امیت شاہ جواب دو‘‘ جیسے نعرے لگا رہے تھے۔