نئی دہلی: دہلی کے اندرا گاندھی بین الاقوامی ہوائی اڈے پر کسٹمز حکام نے منشیات اسمگلنگ کے تین الگ الگ معاملات میں تین مسافروں کو گرفتار کر لیا۔ حکام کے مطابق طیارے کے بیت الخلا، مسافروں کی نشستوں کے نیچے اور سامان میں چھپائی گئی 6.37 کلو گرام مشتبہ ہائیڈروپونک ویڈ برآمد کی گئی۔ ہائیڈروپونک ویڈ بھنگ (کینابس) کی ایک زیادہ طاقتور قسم ہے، جسے مٹی کے بجائے غذائیت سے بھرپور پانی میں اُگایا جاتا ہے۔

حکام کے مطابق تینوں کارروائیاں بنکاک اور فوکٹ سے آنے والے مسافروں کے خلاف کی گئیں، جن کے دوران مجموعی طور پر 6.37 کلو گرام مشتبہ منشیات ضبط کی گئیں۔ پہلے معاملے میں پیر کے روز بنکاک سے آنے والے ایک ہندوستانی مسافر کو ایڈوانس پیسنجر انفارمیشن سسٹم (اے پی آئی ایس) کی بنیاد پر گرین چینل عبور کرنے کے بعد روکا گیا۔

مسافر کے سامان سے کچھ برآمد نہ ہونے پر کسٹمز اہلکاروں نے طیارے کی تلاشی لی، جہاں عقبی حصے کے دونوں بیت الخلاؤں میں چھپائے گئے چار سیل بند پیکٹ ملے، جن میں 3.47 کلو گرام مشتبہ ہائیڈروپونک ویڈ موجود تھی۔ پوچھ گچھ کے دوران مسافر نے اعتراف کیا کہ اس نے یہ پیکٹ خود بیت الخلاؤں میں چھپائے تھے۔

دوسرے معاملے میں فوکٹ سے آنے والے ایک مسافر کو بھی اے پی آئی ایس پروفائلنگ کی بنیاد پر روکا گیا۔ سامان کی تلاشی میں کچھ نہ ملنے پر طیارے کی جانچ کی گئی، جہاں 12ویں قطار کی نشستوں کے نیچے چھپائے گئے چھ سیل بند پیکٹ برآمد ہوئے، جن میں 1.5 کلو گرام مشتبہ ہائیڈروپونک ویڈ تھی۔ مسافر نے بعد میں اعتراف کیا کہ اس نے یہ پیکٹ طیارے میں چھپائے تھے۔

تیسرے معاملے میں اتوار کے روز بنکاک سے آنے والے ایک ہندوستانی مسافر کو گرین چینل عبور کرنے کے بعد اے پی آئی ایس پروفائلنگ کی بنیاد پر روکا گیا۔ ایکسرے جانچ کے دوران اس کے سامان میں مشتبہ اشیا نظر آئیں، جس کے بعد تلاشی لینے پر دو ویکیوم سیل پیکٹ برآمد ہوئے، جن میں تقریباً 1.4 کلو گرام مشتبہ ہائیڈروپونک ویڈ موجود تھی۔ تینوں مسافروں کو نارکوٹک ڈرگز اینڈ سائیکو ٹروپک سبسٹینسز (این ڈی پی ایس) ایکٹ کی دفعہ 43(ب) کے تحت گرفتار کیا گیا، جبکہ برآمد شدہ مشتبہ منشیات کو اسی قانون کی دفعہ 43(الف) کے تحت ضبط کر لیا گیا۔ کسٹمز حکام نے بتایا کہ تینوں معاملات میں ضبط شدہ مادہ سبز رنگ کا این ڈی پی ایس مادہ ہے، جس کے بارے میں شبہ ہے کہ وہ گانجا (ماریجوانا) ہے۔