پتھنم تھٹا (کیرالہ): کیرالہ کے وزیرِ اعلیٰ وی ڈی ستھیسن نے منگل کو پتھنم تھٹا کے دورے کے دوران اعلان کیا کہ سیلاب سے متاثرہ ہر خاندان کو 10 ہزار روپے کی مالی امداد دی جائے گی۔ انہوں نے ضلع انتظامیہ کی جانب سے جاری راحت اور بازآبادکاری کے اقدامات کا بھی جائزہ لیا۔

وزیرِ اعلیٰ نے بتایا کہ ضلع میں اس وقت 133 ریلیف کیمپ قائم ہیں، جہاں 6,400 سے زائد افراد مقیم ہیں۔ زیادہ تر کیمپ تروولا علاقے میں قائم کیے گئے ہیں، جہاں اب بھی سیلابی پانی نہیں اترا۔ جائزہ اجلاس کے بعد صحافیوں سے گفتگو کرتے ہوئے انہوں نے کہا کہ ریاستی حکومت نے امدادی کاموں کے لیے ضلع انتظامیہ کو مکمل مالی اور انتظامی اختیارات دے دیے ہیں تاکہ کسی قسم کی تاخیر نہ ہو۔ انہوں نے کہا، "ضلع میں 133 ریلیف کیمپ چل رہے ہیں، جن میں 6,400 سے زیادہ افراد رہائش پذیر ہیں۔ حکومت نے متاثرہ ہر خاندان کو 10 ہزار روپے کی امداد دینے کا فیصلہ کیا ہے۔"

وزیرِ اعلیٰ نے کہا کہ پتھنم تھٹا میں سیلاب ایک مستقل مسئلہ بنتا جا رہا ہے۔ 2018 اور 2019 کے تباہ کن سیلاب کے بعد جن طویل مدتی اقدامات کی ضرورت تھی، ان پر مؤثر عمل نہیں ہو سکا۔ انہوں نے بتایا کہ دریاؤں میں جمع ہونے والی گاد کے باعث پانی کے بہاؤ کی گنجائش کم ہو گئی ہے اور دریا کم گہرے ہو گئے ہیں، اس لیے گاد ہٹانے کے لیے فوری اقدامات کیے جائیں گے۔

انہوں نے کہا کہ شدید موسمی حالات اچانک پیدا ہونے کی صورت میں لوگوں کو محفوظ مقامات پر منتقل کرنے کے لیے وقت بہت کم ملتا ہے، اس لیے بہتر پیشگی انتباہی نظام کی ضرورت ہے۔ وزیرِ اعلیٰ نے یہ بھی اعلان کیا کہ جن مکانات کو سیلاب سے مکمل نقصان پہنچا ہے، ان کے مالکان کو 6 لاکھ روپے معاوضہ دیا جائے گا۔

جزوی طور پر تباہ ہونے والے گھروں، کسانوں اور تاجروں کے نقصانات کے ازالے سے متعلق فیصلہ بدھ کو ہونے والے کابینہ اجلاس میں کیا جائے گا۔ انہوں نے کہا کہ کیرالہ ملک کا بہترین موسمی پیش گوئی کا نظام قائم کرنے اور قدرتی آفات سے نمٹنے کے نظام کو مزید مضبوط بنانے کی کوشش کرے گا۔ بعد ازاں وزیرِ اعلیٰ نے مختلف ریلیف کیمپوں کا دورہ کیا، متاثرہ افراد سے ملاقات کی اور انہیں ہر ممکن سرکاری تعاون کا یقین دلایا۔

انہوں نے تاجروں کے نمائندوں سے بھی ملاقات کی اور کہا کہ سیلاب سے کاروباری اداروں کو ہونے والے مالی نقصانات پر بھی سنجیدگی سے غور کیا جائے گا۔ ادھر ریاستی وزیر اے پی انیل کمار نے بتایا کہ تمام ضلع کلکٹروں اور متعلقہ حکام کو ہدایت دی گئی ہے کہ متاثرین کو فوری امداد فراہم کی جائے۔ ان کے مطابق ریاست بھر میں 700 ریلیف کیمپ قائم کیے جا چکے ہیں، جہاں تقریباً 15 ہزار افراد مقیم ہیں۔

دریں اثنا، کوٹایم ضلع میں مسلسل بارش کے باعث کئی نشیبی علاقے زیرِ آب آ گئے ہیں، متعدد مکانات اور تجارتی اداروں میں پانی داخل ہو گیا ہے، جبکہ خراب موسم کے پیش نظر تعلیمی ادارے بند کر دیے گئے ہیں۔ پتھنم تھٹا میں پمبا دریا خطرے کی سطح سے اوپر بہہ رہا ہے۔

موژیار ڈیم کے کیچمنٹ علاقے میں ریڈ الرٹ جاری کیا گیا ہے، اور حکام نے خبردار کیا ہے کہ اگر پانی کی آمد میں مزید اضافہ ہوا تو ڈیم کو مختصر اطلاع پر کھولا جا سکتا ہے۔ نشیبی علاقوں کے رہائشیوں کو چوکس رہنے کی ہدایت دی گئی ہے۔