کوچی: کیرالہ ہائی کورٹ نے سبری مالا کے مشہور لارڈ ایّپا مندر میں عقیدت مندوں کو فروخت کی جانے والی مقدس نذر "ادیہ سشٹم گھی" کی فروخت سے متعلق فنڈز میں مبینہ خرد برد کے معاملے کی آزادانہ اور ازسرِنو جانچ کا حکم دیا ہے تاکہ یہ معلوم کیا جا سکے کہ آیا اس معاملے میں بدعنوانی کا مقدمہ بنتا ہے یا نہیں۔

جسٹس راجا وجے راگھون وی اور جسٹس کے وی جے کمار پر مشتمل بنچ نے ویجیلنس اینڈ اینٹی کرپشن بیورو (وی اے سی بی) کی رپورٹ پر عدم اطمینان کا اظہار کرتے ہوئے کہا کہ ادارے کے نتائج سے یہ تاثر ملتا ہے کہ تراونکور دیوسوم بورڈ (ٹی ڈی بی) کو ہونے والے مالی نقصان کی سنگینی کو کم کرکے پیش کیا گیا ہے اور معاملہ بند کرنے کی کوشش کی گئی ہے۔

عدالت نے قرار دیا کہ یہ ایسا معاملہ ہے جس کی دوبارہ جانچ ایک ایسے سینئر افسر کے ذریعے ہونی چاہیے جو بے داغ دیانت داری، ثابت شدہ صلاحیت اور مناسب تجربہ رکھتا ہو۔ عدالت نے حکم دیا کہ تحقیقات کے دوران جمع کیے گئے تمام ریکارڈ اور شواہد فوری طور پر ایک سینئر افسر کے سپرد کیے جائیں، جو پورے معاملے کا آزادانہ جائزہ لے اور یہ طے کرے کہ آیا انسدادِ بدعنوانی ایکٹ 1988 اور بھارتیہ نیائے سنہتا کی متعلقہ دفعات کے تحت کوئی جرم بنتا ہے یا نہیں۔

بنچ نے کہا کہ موجودہ رپورٹ، ریکارڈ شدہ بیانات اور اخذ کیے گئے نتائج سے یہ تاثر پیدا ہوتا ہے کہ تحقیقات کو محض انتظامی کوتاہیوں اور ریکارڈ کی ناقص دیکھ بھال کا معاملہ سمجھ کر آگے بڑھایا گیا، جبکہ رپورٹ میں املاک کی سپردگی، جوابدہی اور بورڈ کو پہنچنے والے نقصان کی اہمیت کو کم تر دکھایا گیا ہے۔

عدالت نے واضح کیا کہ تحقیقات کا مقصد صرف مالی نقصان کی مقدار معلوم کرنا نہیں، بلکہ یہ جاننا بھی ہے کہ نقصان کس طرح ہوا، کون سی انتظامی خامیاں اس کا سبب بنیں اور اس کے ذمہ دار افراد کون ہیں۔ عدالت نے نشاندہی کی کہ وی اے سی بی خود اس نتیجے پر پہنچی تھی کہ گھی کے پیکٹ کاؤنٹر عملے کے سپرد کیے گئے تھے اور ان پر ان کا حساب دینا لازم تھا، لیکن انہوں نے اپنی ذمہ داری پوری نہیں کی۔

اس کے باوجود معاملہ صرف اس بنیاد پر بند کرنے کی سفارش کی گئی کہ ہر ملازم کے حوالے کی گئی گھی کی درست مقدار کا تعین ممکن نہیں تھا، جو بظاہر تحقیقات کے نتائج سے مطابقت نہیں رکھتا۔ وی اے سی بی نے اپنی رپورٹ میں کہا تھا کہ ریکارڈ کی مناسب دیکھ بھال نہ ہونے کے باعث انفرادی طور پر کسی ایک ملازم کی ذمہ داری طے کرنا ممکن نہیں۔

ادارے کے مطابق کیس میں نامزد 43 ملازمین اجتماعی طور پر بورڈ کو ہونے والے نقصان کے ذمہ دار ہیں، لہٰذا ان کے خلاف سخت محکمانہ کارروائی کی جانی چاہیے تاکہ مستقبل میں ایسے واقعات کی روک تھام ہو سکے۔ تاہم عدالت نے اس سفارش سے اختلاف کرتے ہوئے کہا کہ جب تحقیقات میں نمایاں مالی نقصان، حسابات میں غیر واضح کمی بیشی، املاک کی سپردگی اور ان کا حساب نہ دینے جیسے معاملات سامنے آئے ہوں تو محض انتظامی غفلت یا ناقص ریکارڈ کی بنیاد پر معاملے کو نظر انداز نہیں کیا جا سکتا۔

عدالت نے مزید کہا کہ اس کیس میں ملوث افراد سرکاری ملازم ہیں جنہیں مندر کے فنڈز اور نذرانوں کی امانت داری کی ذمہ داری سونپی گئی تھی، اس لیے معاملے کی گہرائی سے جانچ ناگزیر ہے۔ واضح رہے کہ عدالت نے نومبر 2025 سے دسمبر 2025 کے دوران سبری مالا کے سنّیدھانم علاقے میں گھی کی فروخت سے متعلق مبینہ خرد برد کے باعث 17 لاکھ روپے سے زائد کے نقصان کی تحقیقات کا حکم دیا تھا۔ عدالت کے مطابق پیش کیے گئے مواد سے یہ بھی ظاہر ہوتا ہے کہ یہ بے ضابطگیاں صرف مذکورہ مدت تک محدود نہیں تھیں بلکہ اس سے پہلے بھی موجود تھیں اور بعد میں بھی جاری رہیں۔